قازاقستاندىق ءبىرتەكتىلىك ازاماتتىق قاعيداتتارعا سايكەس داميتىن بولادى - ە. توعجانوۆ

 استانا. قازاقپارات - ەلباسىنىڭ ۇسىنعان «ءبىرتەكتىلىك پەن بىرلىك» اتتى ءتورتىنشى ينستيتۋتسيونالدى دامۋ رەفورماسىنىڭ باستى ماقساتى - قوعامدىق كەلىسىم.

بۇل تۋرالى بۇگىن ورتالىق كوممۋنيكاتسيالار قىزمەتىندە قازاقستان حالقى اسسامبلەياسى ءتوراعاسىنىڭ ءبىرىنشى ورىنباسارى ەرالى توعجانوۆ ءمالىم ەتتى.

ونىڭ ءسوزى بويىنشا، قازىرگى ۋاقىتتا ەل الدىنداعى ماقساتتاردىڭ ءبىرى - ازاماتتىق سانا- سەزىمدى قالىپتاستىرۋ. ول نەگىزگى ءتورت باعىت بويىنشا دامىماق.

 «بىرىنشىدەن، قازاقستاندىق ءبىرتەكتىلىك ازاماتتىق قاعيداتتار نەگىزىندە داميتىن بولادى. ەكىنشىدەن، جالپى ازاماتتىق قۇندىلىقتاردىڭ وزەگى «ماڭگىلىك ەل» بولۋى كەرەك. جاڭا ازاماتتىق ءبىرتەكتىلىكتىڭ باسىمدىعى - تاريحي جەتىستىكتەردىڭ اينالاسىندا بىرىگۋ. ۇشىنشىدەن، ءۇش تۇعىرلى ءتىل ءبىز ءۇشىن وتە ماڭىزدى. تورتىنشىدەن، بارلىق جۇمىستار «ماڭگىلىك ەل» جاڭا فورماتسياداعى بۋىندى قالىپتاستىرۋعا باعىتتالادى»، - دەيدى ول.

 «ەلباسىنىڭ ۇسىنعان «ءبىرتەكتىلىك پەن بىرلىك» اتتى ءتورتىنشى ينستيتۋتسيونالدى دامۋ رەفورماسىنىڭ باستى ماقساتى - قوعامدىق كەلىسىم. مۇنىڭ الدىندا مەملەكەتىمىزدە ءبىرتەكتىلىگىن دامىتۋ تۇجىرىمداماسى دا قابىلدانعان بولاتىن. ول 1996 - جىلى قازاقستان تاۋەلسىزدىگىنىڭ قالىپتاسۋ كەزەڭىندە بەكىتىلگەن ەدى. ەڭ باستى كوزدەگەنى، مەملەكەتتىك قۇرىلىمدى نىعايتۋ بولاتىن. كونستيتۋتسيا قابىلدانعاننان سوڭ 1995 - جىلى ەڭ باستى مۇددەلەردىڭ ءبىرى - قازاقستاندى الەمگە مويىنداتۋ. بارلىق دامۋىمىزدىڭ، ەكونوميكالىق بولسىن، الەۋمەتتىك سالادا بولسىن، نەگىزگى قاعيداتى - حالىق بىرلىگى بولعانىن ايتا كەتۋ كەرەك. بۇگىندە ول ماقسات ورىندالدى - حالىقتىڭ 95 پايىزى ءبىز تاۋەلسىز قازاقستاننىڭ ازاماتتارىمىز دەپ سانايدى. ەندى ونى وسى ءتورت باعىتتا جاڭاشا تۇرعىدا رەفورمالاۋىمىز شارت»، - دەپ اتاپ ءوتتى ە. توعجانوۆ.

 اۆتور: جاسۇلان جولدىبايەۆ