وسكەمەندەگى قۇرىلىس ساپاسى قوعامدىق قاداعالاۋدا

استانا. قازاقپارات - وسكەمەندە جاڭادان سالىناتىن الەۋمەتتىك مەكەمەلەر مەن تۇرعىن ءۇي قۇرىلىسىنىڭ ساپاسىن قوعامدىق ۇيىم وكىلدەرى قاداعالايدى.

ال «نۇر وتان» پارتياسى وبلىستىق فيليالىنىڭ بەلسەندىلەرى پايدالانۋعا دايىن باسپانالاردى تەكسەرۋگە كىرىستى.

قوعامدىق جانە پارتيالىق قاداعالاۋ ۇيىمىنىڭ مۇشەلەرى بۇعان دەيىن 3 رەت ارنايى رەيد وتكىزىپ، ناتيجەسىندە جاڭادان بوي كوتەرگەن نىسانداردان جۇزدەگەن تەحنيكالىق كەمشىلىكتەردى انىقتاپ، ونى تۇزەتۋگە ۇسىنىس بەرگەن.

«نۇر وتان» پارتياسىنىڭ بەلسەندىلەرى مەن قوعامدىق ۇيىم وكىلدەرى قالادا مەملەكەتتىك قارجىعا سالىنىپ جاتقان كەز كەلگەن نىسانعا ەش ەسكەرتۋسىز كەلەدى. قۇرىلىسقا جاۋاپتى بارلىق مەكەمەنىڭ وكىلدەرىمەن كەزدەسىپ، نىساننىڭ جوباسى بويىنشا بۇگە- شىگەسىنە دەيىن تانىسادى.

تەكسەرىس كەزىندە، نەگىزىنەن، قۇرىلىستى مونتاجداۋ تەحنولوگياسى، ينجەنەرلىك جانە جىلۋ ساقتاۋ جۇيەلەرىنەن كەمشىلىكتەر انىقتالادى. قوعامدىق ۇيىم وكىلدەرى قۇرىلىس ساپاسىن تۇزەتۋگە مەردىگەر مەكەمەلەرگە 1 اپتا ۋاقىت بەرەدى. وتكەن اپتادا وسكەمەن قالاسىنان ۇلى وتان سوعىسىنىڭ 4 ارداگەرىنە پاتەر تابىستالدى.

الايدا قاريالارعا بەرىلگەن باسپانالاردان ءبىرقاتار كەمشىلىك انىقتالدى. ەلەكتر مەن كوممۋنالدىق جۇيەسى دۇرىس ىسكە قوسىلماعان. دەگەنمەن اتقارۋشى بيلىك بىردەن شارا قولدانىپ، جاڭا پاتەرلەردەگى كەمشىلىكتەردى تۇزەگەن. سوندىقتان قوعامدىق ۇيىم وكىلدەرى بولاشاقتا وسىنداي جاعداي قايتالانباس ءۇشىن ءبىر نىساندى ءبىر مەردىگەر باستان- اياق سالىپ ءبىتىرۋى ءتيىس دەگەن پىكىردە.

سەرىك ورازبايەۆ، قالالىق ءوزىن-ءوزى باسقارۋ ۇيىمىنىڭ ءتوراعاسى:

- ءۇيدى، بالالار وينايتىن الاڭدى سالۋدى ءبىر كومپانيا ىستەسە، سوندا جاۋاپكەرشىلىك تە بولادى.

اتقارۋشى بيلىك قالاداعى قۇرىلىس سالاسى بويىنشا قوعامدىق ۇيىم وكىلدەرىمەن بىرلەسىپ جۇمىس ىستەۋگە دايىن. ولاردىڭ ۇسىنىس- تىلەكتەرىن دە قابىلداۋعا ءازىر. ال جاڭادان سالىنعان شاعىن اۋدانداردا دۇكەن، ءدارىحانا جانە قىزمەت كورسەتۋ نىساندارى دا بىرتىندەپ بوي كوتەرمەك.

ۆلاديمير گولوۆاتيۋك، قالا اكىمىنىڭ ورىنباسارى:

- كارل ماركس كوشەسىندەگى ۇيلەر 3 -جىل بۇرىن سالىنعان. ول جەردە دۇكەن بار. شاعىن اۋدان بىرتىندەپ كوركەيىپ كەلەدى. جاڭادان بوي كوتەرگەن باسقا اۋداندار دا ءدال سولاي كوركەيەتىن بولادى. دۇكەن، ءدارىحانا سالىنادى.

بيىل وسكەمەن قالاسىندا «قولجەتىمدى باسپانا-2020» باعدارلاماسى بويىنشا كوپقاباتتى 9 ءۇي پايدالانىلۋعا بەرىلمەك. قازىر ول باسپانالاردىڭ قۇرىلىسى 70-80 پايىزعا اياقتالدى. ۇيلەر تولىق سالىنىپ بىتكەنگە دەيىن قوعامدىق ۇيىم وكىلدەرى باقىلاۋدا ۇستاماق.

www.24.kz