قازاق «قازاققا» قازاقشا سويلەگەنى ءۇشىن ايىپتى بولدى
بىزگە ونى شاراسىزدىق سوقپاعى اكەلىپتى. قولىندا دودا-دودا قاعازى بار. ونىسى - باس سۇعىپ شىققان مەكەمەلەرىنەن «جيناپ» العان رەسمي قۇجاتتار. الدىمىزعا جايىپ سالدى... باسىنان باستايىق.
ماسەلە بىلاي بولعان. وسىدان ەكى اپتا بۇرىن، كولىك تىزىگىنىندە كەلە جاتىپ، اقتولقىن اڭداۋسىز باعدارشامنىڭ قىزىل تۇسىنە ءوتىپ كەتىپتى- مىس. ءتارتىپ ساقشىلارى ونى توقتاتىپ، ەرەجە بۇزعانىن ايتادى. مۇنىسىن ايعاقتايتىن بەينەجازبانى كورمەككە، تاياۋ جەردەگى، ياعني گەرتسەن كوشەسىندەگى پوليتسيا بولىمشەلەرىنىڭ بىرىنە بارىپتى.
الايدا بەينەجازبانى جول ساقشىلارى جوپەلدەمەدە تاۋىپ بەرە الماعان. «مەن سوندا دا كەشىرىمىمدى سۇراپ، قانشا بولسا دا ءتيىستى ايىبىمدى وتەۋگە دايار ەكەنىمدى ايتتىم. حاتتاما تولتىراتىن بولدىق. سول كەزدە ولار ماعان حاتتامانى ورىس تىلىندە تولتىرۋدى مىندەتتەدى. مەن ورىسشا بىلمەيتىنىمدى، قازاق تىلىندە جازاتىنىمدى ايتقانىمدا، باسىن شايقاپ، قاسارىپ وتىرىپ الدى. ول ءتىلدى بىلمەسەم قايتەمىن؟ مەنىڭ دە ايتقانىمنان قايتقىم كەلگەن جوق. سوندا دا كۇشتەپ ورىس تىلىندە تولتىرتۋعا تىرىسىپ باقتى. «قازاقشانى ءوز ەلىڭدە، اۋىلىڭدا جازاسىڭ» دەپ جەكىردى، - دەيدى اقتولقىن، - «ءوز ەلىڭدە» دەپ مەنىڭ وڭتۇستىكتىڭ قىزى ەكەنىمدى مەڭزەسە كەرەك. قوستانايدا ءومىر ءسۇرىپ جاتقانىما 15 جىل بولدى...».
وسىلايشا، بۇل ازاماتشا دوسمايلوۆ د. اتتى سەرجانتتىڭ وزىنە پسيحولوگيالىق قىسىم كورسەتكەنىن ايتىپ بەردى.
ورنىنان تاپجىلتپاي، قورقىتىپ- ۇركىتكەن سوڭ ايتولقىننىڭ ۋاقىت وتە كەلە جۇيكەسى سىر بەرىپ، حالى كۇرت ناشارلاپ... اقىرىندا جەدەل جاردەم شاقىرتىلىپتى. ونى دالەلدەيتىن اۋرۋحانادان العان انىقتاما قاعازى دا ءالى قولىندا ءجۇر. DSCN1457
ايىعىپ شىققان سوڭ دا اقتولقىن مۇنى جىلى جاۋىپ قويماۋعا بەل بۋعان. ءسويتىپ، جول ساقشىسىنا قارسى ارىز جازىپ، كوكەيىن تەسكەن ماسەلەسىن ارقالاپ، وبلىستىق ءى ءى د- نە، قالالىق سوتقا جانە «نۇر وتان» پارتياسىنىڭ كەڭسەسىنە كىرىپ شىققان.
«جاۋابى بىرەر اپتانىڭ شاماسىندا بولادى» دەگەندەردىڭ كوبى ءالى ءۇنسىز ەكەن. ەگەر شاعىمى ەشبىرى ەلەۋسىز قالسا - ودان ءارى ىزدەنۋگە بەكىنىپ وتىر ول.
«مەملەكەتتىك قىزمەتكەردىڭ مەملەكەتتىك تىلگە پىسقىرىپ قارامايتىنى شىمبايعا باتتى. «قازاقتىڭ» الدىندا قازاقشا سويلەيتىنىم ءۇشىن ايىپكەر بولدىم. قالاي ىزاڭ كەلمەيدى؟!»، - دەيدى اقتولقىن اشىنىپ.
ءبىزدىڭ رەداكسيا اتالعان ماسەلەنى ارقاۋ ەتىپ، وبلىستىق ءى ءى د-نىڭ باستىعى، پوليتسيا گەنەرال- مايورى ت. س. ماتكەنوۆكە حات جولدادى. تۇيتكىلدى جايتقا قاتىستى بەرەر جاۋابىن، ءادىل تورەلىگىن كۇتۋدەمىز.