الماتىدا بيە سۇتىنەن دايىندالعان تورتتار مەن شوكولادتار تانىستىرىلدى - فوتو
دەپ حابارلايدى Massaget.kz.
بۇل تۋرالى باسپا ءسوز وكىلدەرىنە ۇيىمنىڭ پرەزيدەنتى تورەگەلدى شارمانوۆ ايتتى.
«جاقىندا بيە سۇتىنەن جاسالعان تاعامداردىڭ كومەگىمەن ونكولوگيالىق، پسيحولوگيالىق اۋرۋعا شالدىققان ناۋقاستاردى ەمدەدىك. اۋرۋى قوزعان، كوڭىل كۇيى جوق ادامدار ءۇشىن پايداسى مول. جۇرەك- قان تامىرلارى اۋرۋلارى وسى ءونىمنىڭ ارقاسىندا ەمدەلىپ جاتىر»، - دەيدى ت. شارمانوۆ ءونىمدى تانىستىرۋ راسىمىندە. مۇنىمەن قاتار ول بيە سۇتىندە سيىر سۇتىندەگىدەي ترانسماي قىشقىلدارىنىڭ جوق ەكەنىن ايتىپ ءوتتى.
«ءونىمىمىزدىڭ قۇرامىندا سيىر سۇتىندەگى زياندى زاتتار جوق. ال سيىردىڭ تابيعي سۇتىندە ترانسماي قىشقىلدارى بولادى. ول - ۋلى زات. ءبىز تۇتىنىپ وتىرعان بيە ءسۇتىنىڭ قۇرامىندا وستەوپوروز، ديابەت، اتەروسكلەروز سىندى اۋرۋلارعا قارسى تۇرۋعا كومەكتەسەتىن زەتتەكتەر مەن اقۋىز بار»، - دەدى ت. شارمانوۆ.
تورەگەلدى شارمانوۆتىڭ ايتۋىنشا، ترانسماي قىشقىلى ونكولوگيالىق اۋرۋلارعا اكەلىپ سوعادى ەكەن.
«ەمىزەتىن بالاسى بار انالار قۇرامىندا ترانسماي قىشقىلى بار ءسۇتتى ءىشىپ، ارتىنشا ونى ءسۇت بەزى ارقىلى بالاسىنا بەرەدى. وسىنىڭ سالدارىنان بالانىڭ تانىمدىق قابىلەتى تومەندەپ، شەكتەن تىس ارتىق سالماق قوسادى. ترانسماي قىشقىلدارى ءسۇت بەزى ارقىلى شىعاتىندىقتان، بۇل مۇشە وبا اۋرۋىنا شالدىعادى. ال ەرلەردە پروستاتا وبىرى داميدى».
قازاق تاعامتانۋ اكادەمياسىنىڭ ۆيسە- پرەزيدەنتى يۋري سينياۆسكي بيە ءسۇتىنىڭ كلينيكالىق تاجىريبەدەن وتكەنىن ايتتى. سونداي- اق، بيە سۇتىنەن ەمدىك ونىمدەر دايىنداۋ ءۇشىن اكادەميا پاتەنت العانىن حابارلادى.
«بۇل ونىمدەر جۇرەك- قان تامىرلارى اۋرۋلارى، تۋبەركۋلەز كەزىندە، ەسىرتكى قاتەرلى ىسىگى كەشەندى تەراپياسىندا قولدانىلادى. ءبىز كلينيكالىق تەكسەرۋ جۇرگىزىپ، وڭ ناتيجە الىپ وتىرمىز. بۇدان وزگە حيميالىق، ساۋلەلەندىرۋ تەراپيالارى كەزىندە پايدالانىلادى»، - دەدى ول.
ءدال قازىر قازاقستاندا بيە ءسۇتىنىڭ نەگىزىندە جاسالعان 15 ءتۇرلى تاعام بار. ايتا كەتسەك، قازاق تاعامتانۋ اكادەمياسىنىڭ باسشىلىعىمەن ءوز جۇمىسىن باستاعان «اميران» زاۋىتى تورت، شوكولاد، ىرىمشىك، يوگۋرت، پەچەنە سىندى ونىمدەرگە بيە ءسۇتىن قوسىپ جاتىر. اتالعان زاۋىت ءوزى شىعارعان ونىمدەردى بىلاي اتاعان ەكەن: «دەنساۋلىق» جانە «سالامات» تورتى، «سەنىم» شوكولادى، «بەرەكە» جانە «داۋا» يوگۋرتى، «باقىت» بالمۇزداعى، «اسىل» پەچەنەسى جانە «شيپا» اتتى ىرىمشىك.