ورالدا تاتار حالقىنىڭ مەيرامى سابانتوي تويلاندى - فوتو
جينالعان جۇرتشىلىقتى سابانتويمەن قۇتتىقتاعان وبلىس اكىمىنىڭ ورىنباسارى باقتيار ماكەننىڭ ءمالىم ەتكەنىندەي، اتالمىش مەرەكە تاتار باۋىرلار عانا ەمەس، وڭىردە تاتۋ-ءتاتتى ءومىر ءسۇرىپ جاتقان بارلىق ۇلت وكىلدەرىنىڭ ورتاق تويىنا اينالدى. بيىلعى سابانتويدىڭ ەرەكشەلىگى، ول ەلباسى جاريالاعان قازاقستان حالقى اسسامبلەياسى جىلى اياسىندا ۇيىمداستىرىلىپ وتىر. اسسامبلەيانىڭ 20 جىلدىعى اتالىپ ءوتىلىپ جاتقان جىلدا اتالمىش مەيرامنىڭ دا ءباسى جوعارى، ءمانى ەرەكشە.
«ءبىز تۇراقتىلىقتى باعالاي بىلگەنىمىزدىڭ ارقاسىندا بۇگىنگى تابىستارعا جەتتىك. ەشكىمدى كەمسىتپەي، ەشكىمنىڭ ءتىلى مەن ءدىلىن مانسۇقتاماي، بارلىق ازاماتتارعا تەڭ مۇمكىندىك بەرۋ ارقىلى تۇراقتىلىقتى نىعايتىپ كەلەمىز. ءبىزدىڭ كەيىنگى ۇرپاققا اماناتتار ەڭ باستى بايلىعىمىز - ەل بىرلىگى بولۋى كەرەك»، - دەپ نۇرسۇلتان ءابىش ۇلى نازاربايەۆتىڭ «نۇرلى جول - بولاشاققا باستار جول» اتتى جولداۋىندا اتاپ وتكەنىندەي، وسىنداي ورتاق مەرەكەلەر ارقىلى ەل بىرلىگى نىعايا تۇسەدى.
تاتار حالقىنىڭ مەيرامىمەن ورال قالاسىنىڭ اكىمى التاي كولگىنوۆ تە قۇتتىقتاپ، مۇنداي مەرەكەلەرمەن مەرەيىمىز وسە تۇسەتىنىن اتاپ ءوتتى.
قالالىق مادەنيەت جانە دەمالىس ساياباعىندا تاتارستان استاناسى قازان قالاسىنان ارنايى كەلگەن بەلگىلى ارتىستەردىڭ قاتىسۋىمەن كونسەرت قويىلدى. وعان وبلىس اۋداندارىنان كەلگەن شىعارماشىلىق ۇجىمدار دا بەلسەنە قاتىستى. جينالعاندارعا، اسىرەسە، تاتار حالىق اندەرى ايرىقشا اسەر قالدىردى. سونىمەن قاتار «تەڭگە الۋ»، «تاياق تارتۋ»، «قۇمىرا سىندىرۋ»، «بۇرىم ورۋدەن» حالىقتىق سايىستار توسىندىعىمەن ەرەكشەلەنسە، بالالار اسفالتقا سۋرەتتەر سالدى. ارقان تارتۋ، گىر تاسىن كوتەرۋ، تاتار كۇرەسىنەن وزىپ شىققاندار دا سىي-سياپاتسىز قالعان جوق. ەندى ءبىرقاتارى تاتار اندەرىن ورىنداۋدان سىنعا تۇسسە، كەيبىرەۋلەرى سىرنايلارىن سىزىلتتى. جان جادىراتار تاتار بيلەرى دە بيلەنىپ جاتتى. مەرەكەگە كەلگەندەر تاتار حالقىنىڭ ۇلتتىق كيىمدەرىن تاماشالاپ، ۇلتتىق تاعامدارىنان ءدام تاتتى.
«تاڭ» تاتار-باشقۇرت مادەني ورتالىعىنىڭ اتقارۋشى ديرەكتورى سۆەتلانا تەنيشيەۆانىڭ ايتۋىنشا، سابانتوي سوقا جانە توي دەگەن تۇركى سوزدەرىنەن الىنعان. سابانتوي كوكتەمگى ەگىس جۇمىستارى بىتكەننەن كەيىن تويلانادى. ياعني ەگىن ەگىپ، كوڭىلىن جايلاعان اعايىننىڭ كول-كوسىر قۋانىشىن بىلدىرەدى. بۇگىنگى تاڭدا سابانتوي تاتارستان عانا ەمەس، قازاقستاندا دا كەڭىنەن تويلانىپ كەلەدى.
ايتا كەتەيىك، ورالدا سابانتويدىڭ اتالىپ وتىلە باستاعانىنا ون جىلداي ۋاقىت بولدى. وڭىردە توعىز مىڭداي تاتار ۇلتىنىڭ وكىلدەرى تۇرادى. ورالدىقتار، اسىرەسە، تاتار حالقىنىڭ ۇلى اقىنى عابدوللا توقايدىڭ ەسىمىن ەرەكشە قاستەر تۇتادى. ورال قالاسىندا بالالىق جانە جاستىق شاعى وتكەن اقىننىڭ ەسكەرتكىشى ورناتىلىپ، كوشەگە اتى بەرىلگەن. سونداي-اق مۋزەيدە دە قۇندى جادىگەرلەر جيناقتالعان.
اۆتور: ەلجان ەرالى