الماتى وبلىسىندا جابايى وگىزدەر وسىرىلۋدە
باعزى زاماننان بۇگىنگە دەيىن امان جەتكەن اسا ءىرى جابايى وگىزدەردىڭ 500 گە جۋىعى قازىرگى كەزدە «بەلوۆەج توعايى ۇلتتىق قورىعىنىڭ» بەلورۋسسيالىق بولىگىندە مەكەندەيدى.
سانى ازايىپ، جويىلىپ كەتۋدىڭ الدىندا تۇرعان سيرەك كەزدەسەتىن جانۋارلار ول جاقتا قاتاڭ قورعاۋعا الىنعان. ەۋرازيالىق ەكونوميكالىق وداق اياسىندا بولاشاقتى بىرگە قامداپ وتىرعان وسى ەلمەن ەكى اراداعى ىنتىماقتاستىق پەن ىسكەرلىك بايلانىس ناتيجەسىندە زۋبرلاردى قازاقستاندا دا ءوسىرىپ، كوبەيتۋگە نازار اۋدارىلا باستادى.
وسىناۋ يگىلىكتى ءىستى جۇزەگە اسىرۋعا بەل بۋعان « ZHERSU» ينۆەستيتسيالىق ونەركاسىپتىك كورپوراتسياسى ديرەكتورلار كەڭەسىنىڭ ءتوراعاسى باۋىرجان وسپانوۆتىڭ باستاماسىمەن « بەلوۆەج توعايى» ۇلتتىق باعىنان جەتىسۋ جەرىنە، ونىڭ ىشىندە الاكولدىڭ ۇيگەنتاس وڭىرىنە سەگىز جابايى وگىز: جاستارى 2-4 ارالىعىنداعى ەكى بۇقا مەن التى انالىق اكەلىندى.
شەتەلدەن جەتكىزىلگەن جانۋارلاردى باعىپ- قاعىپ، ءوسىرىپ- كوبەيتۋ سەنىپ تاپسىرىلعان « تاۋ سامال ل ت د» ج ش س ديرەكتورى ومىربەك احمەتوۆتىڭ ايتۋىنشا، زۋبرلار جەرگىلىكتى جەرگە جەرسىندىرۋ كەزەڭىنەن ويداعىداي ءوتىپتى. ءتورت مىڭ شاقىرىم قاشىقتىقتان، التى كۇن جولدا بولىپ جەتكىزىلگەن جابايى جانۋارلار بىردەن وزدەرىنە لايىقتالىپ، دايىندالعان 50 گەكتارلىق تابيعي قورشاۋعا جىبەرىلىپتى.
ارقاس الاتاۋىنىڭ قويناۋىنداعى ويجايلاۋ اۋىلىنىڭ تۇسىندا، شالعىنى بەلۋاردان، شۇرايلى جايىلىمى مەن سۋى تۇنىق تۇمالارى بارشىلىق، قايىڭ مەن كوكتەرەك، ۇيەڭكى مەن شەتەن، تاعى دا باسقا بۇتالى توعايلار شوعىرى كەزەكتەسە ورنالاسقان جاسىل جەلەكتى اۋماقتى القاپ زۋبرلارعا جاعىپتى. قىستاتۋ قامى دا قازىردەن ويلاستىرىلىپ جاتقان كورىنەدى. الاكولدىڭ قاتاڭداۋ قىسىنا قىڭا قويمايتىن تەرىسى قالىڭ جانۋارلاردى قوسىمشا ازىقتاندىرۋ الاڭدارى جابدىقتالۋدا.
زۋبرلاردى شەتەلدەن قازاقستانعا جەتكىزۋ وڭايعا سوقپاپتى. بىرنەشە ايعا سوزىلعان ازىرلىك جۇمىستارى بارىسىندا ەكى مەملەكەت اراسىندا ءبىرقاتار رۇقساتنامالىق قۇجاتتار راسىمدەلگەن. جابايى جانۋارلار ۇستالعاننان كەيىن، سول جەردە مال دارىگەرلەرىنىڭ قاتاڭ تەكسەرۋىنەن وتكىزىلىپ، ءار جابايى وگىزگە كەدەندىك وداق تالابىنا سايكەستىكتەگى ۆەتەرينارلىق كۋالىك تولتىرىلىپتى.
قازىرگى كەزدە قازاقستاندا زۋبرلار ەكى جەردە عانا شاعىن توپپەن تارالعان. « بۋراباي» تابيعات باعىندا ون باس بولسا، ەندى مىنە، ۇيگەنتاس وڭىرىندە سەگىز باس جابايى وگىز وسىرىلۋدە.