ج. نابيۋللين جاڭاقالا (قازىرگى بوكەي ورداسى) اۋدانى ۇيالى اۋىلىندا 1936 - جىلدىڭ 13 - جەلتوقسانىندا دۇنيەگە كەلدى. جەمىستى باستاۋىش، ۇيالى جەتىجىلدىق، س. كيروۆ اتىنداعى ورتا مەكتەپتەردە ءبىلىم الىپ، 1954 - جىلى فۋرمانوۆ ورتا مەكتەبىن ءتامامدادى.
1960 - جىلى ا. پۋشكين اتىنداعى ورال پەداگوگيكالىق ينستيتۋتىنىڭ تاريح- فيلولوگيا فاكۋلتەتىن بىتىرگەننەن كەيىن قىرىق ءۇش جىل بويى اۋداندىق، وبلىستىق جانە رەسپۋبليكالىق باسىلىمداردا ەڭبەك ەتتى. اسىرەسە، ءومىرىنىڭ كوپ جىلىن باتىس قازاقستان وبلىستىق «ورال ءوڭىرى» گازەتىنە ارنادى. سونىمەن قاتار قازاقستان جازۋشىلار وداعىنىڭ باتىس قازاقستان وبلىس ارالىق بولىمشەسىندە كەڭەسشى قىزمەتىن دە ابىرويمەن اتقاردى. ول 1960 - جىلداردىڭ اياعىنان باستاپ وسى وڭىردەگى قالام ۇستاعان جاستاردىڭ بارىنە ۇستازدىق ەتتى. شاكىرتتەرىنىڭ الدى بۇگىندە جەتپىس بەس جاستىڭ بەلەسىنەن استى.
اقىننىڭ العاشقى ولەڭدەرى 1961 - جىلى قازاق مەملەكەتتىك كوركەم ادەبيەت باسپاسىنان شىققان «جاس داۋرەن» اتتى ۇجىمدىق جيناقتا جاريالاندى. ونىڭ تىرناقالدى جىرلارىن عافۋ قايىربەكوۆ سىندى قازاقتىڭ ءدۇلدۇل اقىنى جوعارى باعالاپ، اق باتاسىن بەردى. ج. ءنابيۋلليننىڭ ءار جىلدارى ورتالىق باسپالاردان «اق جاڭبىر»، «تانىس اۋەندەر»، «اق سويلە، جۇرەگىم»، «جىرلايدى جىلدار»، «جەتىنشى پەرنە»، «جوعارعى كەرنەۋ» جانە باسقا ۇزىن سانى 14 كىتابى جارىق كورگەن. ال ەڭ تاڭداۋلى ولەڭدەرى 1977 - جىلى «قازاق سوۆەت پوەزياسىنىڭ انتولوگياسىنا» ەندى.
ج. نابيۋللين ورالدا تۇرعانىمەن، الماتىلىق اقىندار دا ونى مويىندايتىن، قازاق پوەزياسىنداعى كەسەك تۇلعالاردىڭ ءبىرى دەپ بىلەتىن. زامانداسى، قازاقتىڭ ۇلى اقىنى قادىر مىرزا ءالى جانعالي نابيۋلليننىڭ شىعارماشىلىعى تۋرالى «جاس الاش» گازەتىندە جاريالاعان «وسى جۇرت جانعاليدى بىلە مە ەكەن؟» دەگەن ماقالاسىمەن قاتار كىتابىنا العى ءسوز دە جازدى.
جانعالي نابيۋللين اقىندىعىمەن قاتار جۋرناليستيكانىڭ دا ماڭدايالدى شەبەرلەرىنىڭ ءبىرى بولاتىن. كەزىندە قارا سوزگە دە اۋىسىپ، كوركەم جانە سىقاق اڭگىمەلەر جازدى.
ج. نابيۋللين - 1969 - جىلدان بەرى ك س ر و جانە قازاقستان جازۋشىلار وداقتارىنىڭ مۇشەسى، جاڭاقالا، بوكەي ورداسى اۋداندارى جانە ورال قالاسىنىڭ قۇرمەتتى ازاماتى، قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ قۇرمەت گراموتاسىمەن ماراپاتتالعان.
ونشاقتى جىل بويى اۋىر ناۋقاسقا شالدىققان اقىن ورازا ايىندا، قاسيەتتى جۇما كۇنى كوز جۇمدى.
اۆتور: ەلجان ەرالى