ەۋروپالىق وداق قازاقستاندىقتار ءۇشىن ۆيزالىق رەجيمدى جەڭىلدەتۋگە دايىن

استانا. قازاقپارات - ەۋروپالىق وداق قازاقستاندىقتار ءۇشىن ۆيزالىق رەجيمدى جەڭىلدەتۋگە كەلىسىپ وتىر.

بۇل تۋرالى بۇگىن ورتالىق كوممۋنيكاتسيالار ورتالىعىندا ق ر سىرتقى ىستەر مينيسترىنىڭ ورىنباسارى - ەكسپو-2017 حالىقارالىق كورمەسىنىڭ كوميسسارى ءراپىل جوشىبايەۆ ءمالىم ەتتى.

«ءبىز مەملەكەت باسشىسىنىڭ تاپسىرماسىمەن قازاقستاندىقتار ءۇشىن ۆيزالىق رەجيمدى جەڭىلدەتۋ ءۇشىن ەۋروپالىق وداق ەلدەرىمەن كەلىسسوزدەر جۇرگىزۋدەمىز. ءوز كەزەگىندە ەۋروپالىق وداق مەملەكەتتەرى وسى باعىتتا جۇمىس جاساپ جاتىر، ەگەر ءبىز قازاقستاندىق زاڭنامانى ەۋروپالىق نورمالارمەن سايكەستەندىرەتىن بولساق، ولار قازاقستاندىقتارعا ۆيزالىق رەجيمدى جاقسارتۋعا دايىن تۇر»، - دەيدى ول.

ونىڭ سوزىنە قاراعاندا، سايكەستەندىرۋ جونىندەگى اڭگىمە زاڭسىز كوشى-قون، ۇيىمداسقان قىلمىسقا قارسى كۇرەس، ازاماتتاردى ەلگە قايتارۋ، ەلدەن باسساۋعالاۋعا ءماجبۇر ازاماتتارعا باسپانا بەرۋ، شەكارا قىزمەتى، ەسىرتكى تاسىمالى، پاسپورتتاردىڭ قورعاۋ قاسيەتتەرىن جەتىلدىرۋ، جەكە اقپاراتتاردىڭ قورعالۋى سالاسىنداعى زاڭنامالاردا بولىپ وتىر.

«وسى ماقساتتا بىزدە ق ر مەن ە و اراسىندا ۆيزالىق رەجيمدى جەڭىلدەتۋ بويىنشا شارالار جوسپارى جاساقتالۋدا. ول ەنگىزىلەتىن بولسا، ۆيزالىق رەجيمدى جەڭىلدەتۋ باعىتىندا ناقتى ىستەر جاسالادى»، - دەدى ر. جوشىبايەۆ.

قازىرگى ۋاقىتتا جوسپار جوباسى ۇكىمەتتە قارالۋدا جانە جاقىن ارادا قابىلدانۋى شارت.

اۆتور: جاسۇلان جولدىبايەۆ