وڭتۇستىك قازاقستان وبلىسىندا تۇڭعىش رەت شىنتاق بۋىنىن الماستىرۋ وپەراتسياسى جاسالدى
22:09, 08 - شىلدە 2015
استانا. قازاقپارات - وڭتۇستىك قازاقستان وبلىستىق كلينيكالىق اۋرۋحاناسىندا تۇڭعىش رەت شىنتاق بۋىنىن الماستىرۋ وپەراتسياسى جاسالدى، دەپ حابارلادى shymkenttv.kz.
دارىگەرلەردىڭ ايتۋىنشا، جىلىنا وسىنداي دەرتكە شالدىققان 100 گە تارتا ناۋقاس وپەراتسيا جاساتامىن دەپ، مەديتسينالىق كومەك كۇتەدى. نازارعا الساق، استانا مەن الماتىدا كۇنى بۇگىنگە دەيىن نەبارى 5 ازاماتقا جاساندى بۋىن قويىلعان.
شەتەلدى ايتپاق تۇگىلى، قازاقستاننىڭ ءىرى ەكى قالاسىندا ەم- دوم جاساۋدىڭ ءوزى قاراپايىم ادام قالتاسىنا وڭايعا سوقپايدى. وبلىستىق كلينيكالىق اۋرۋحانادا قولعا الىنعان وتا تەگىن ىسكە اسىرىلادى.
رەسەيدىڭ وزىق دارىگەرلەرىمەن وتا جاساعان ءبىزدىڭ مامانداردىڭ پايىمىنشا، دەرتكە ادەتتە ريەۆماتيزممەن، بريۋتسەللەزبەن اۋىرعان، قولىن سىندىرىپ العان ادامدار شالدىعادى. ال، وتا قىمباتتىلىعىمەن، تەحنولوگيالىق جاعىنان وتە كۇردەلى بولۋىمەن ەرەكشە.