بۇل تۋرالى قالا اكىمىنىڭ ورىنباسارى بولات ساۋرانبايەۆ مالىمدەدى.
ونىڭ ايتۋىنشا، قازىر كوپىردىڭ قۇرىلىسى جالعاسىپ جاتىر. قاتەلىك جىبەرگەن قوسالقى مەردىگەر جوبادان شىعارىلدى. «جوبالاۋشىلار مەن ورىنداۋشىلار قاتەلىك جىبەرگەن. بۇل رەسەيلىك كومپانيا، ول قالىپتى جوبالاۋ كەزىندە قاتەلەستى. سول قاتەلىكتىڭ سالدارىنان بەتون قۇيىلعان كەزدە، قالىپ شىداماعان. بازيس سوت بويىنشا بارلىق تالاپتى قويدى. ول جەردە ءبىز بيۋدجەت قارجىسىن جۇمساعان جوقپىز. بۇل رەسەيلىكتەردىڭ كىناسى. ولار شىققان شىعىندى وتەيدى»، - دەدى ول.
الماتى قالالىق اۆتوموبيل جولدارى باسقارماسى باسشىسىنىڭ ورىنباسارى عاني مىرزاحانوۆتىڭ ايتۋىنشا، كوپىردىڭ قۇرىلىسىنا قاتىستى وندىرىستىك جۇمىس جوباسىنىڭ ەسەبىن مەردىگەر ۇيىم «بازيس» دايىنداعان.
«رەسەيلىك كومپانيا ءو ج ج- نى (وندىرىستىك جۇمىس جوباسى - اۆت.) جەتىلدىردى، بارلىق سىزبانى، جابدىقتاردى ۇسىنىپ، قالىپتىڭ شەف-مونتاجىنا قاتىستى. قالىپ ءو ج ج- گە، سىزبالارعا سايكەس تۇرعىزىلدى. ول كومپانيا قالىپ شىدايدى دەپ، بارلىق قۇجاتقا قول قويدى، دۇرىس تۇرعىزىلدى دەپ، جۇمىستى جالعاستىرۋ ءۇشىن بەتون ءمونوليتىن قۇيۋعا رۇقسات بەردى.
ءبىراق ءوندىرىس جۇمىسىنىڭ 90 پايىزى جۇكتەلگەندە قالىپ شىدامادى. ساراپشىلاردىڭ ايتۋىنشا، وندىرىستىك جۇمىس جوباسىن ازىرلەگەن كومپانيا بۇل جوبانىڭ بارلىق نيۋانسىن تولىق ەسكەرمەگەن. ولاردىڭ اراسىندا كولدەنەڭىنەن تۇسەتىن كۇشكە قاتىستى ەسەپتىڭ جەتىسپەۋشىلىگى جانە تاعى دا باسقالارى بار»، - دەدى مىرزاحانوۆ.
ونىڭ ايتۋىنشا، بۇل وقيعانى قازىر قالا اكىمدىگىنىڭ ەڭبەك بويىنشا دەپارتامەنتى باسشىسىنىڭ ورىنباسارى باستاعان كوميسسيا تەرگەپ جاتىر.
ايتا كەتەيىك، كوپىردىڭ قۇرىلىسى گرافيككە سايكەس 2016 -جىلى اياقتالادى. ساۋرانبايەۆتىڭ ايتۋىنشا، بۇل وقيعاعا بايلانىستى ۋاقىت شەگەرتىلمەيدى. ەسكە سالا كەتەيىك، وقيعا 2015 -جىلى 24 -ساۋىردە بولدى. كوپىردىڭ قۇلاۋ سالدارىنان ءبىر جۇمىسشى قازا تاپتى.