قوڭىرات اۋىلىنداعى مىس وندىرەتىن زاۋىت ءوندىرىس قۋاتىن ۇلعايتتى
وسىدان ءۇش جىل بۇرىن يندۋستريالاندىرۋ كارتاسى باعدارلاماسى بويىنشا اشىلعان زاۋىت بۇعان دەيىن جىلىنا 10 مىڭ توننا ءونىم وندىرسە، ەندى 15 مىڭعا جەتكىزبەك.
تيىسىنشە، ءوندىرىس وشاعىنىڭ جۇمىسىنا جەرگىلىكتى تۇرعىندار دا كوپتەپ تارتىلۋدا. اۋىل ىرگەسىندە تاۋ- تاۋ بولىپ ءۇيىلىپ جاتقان ءوندىرىس قالدىقتارى سىرت كوزگە كەرەكسىز سياقتى. ءبىراق گەولوگتار شامامەن 1 ميلليارد تونناعا جەتەتىن قيىرشىق تاستاردىڭ قۇرامىندا مىس قورى مول ەكەنىن انىقتاعان. وسىلايشا، ءۇش جىل بۇرىن اعىلشىندىق كومپانيا قارجى قۇيىپ، كاتودتى مىس وندىرەتىن زاۋىت اشتى.
«ءۇش جىل ىشىندە 30 مىڭ توننادان ارتىق كاتودتى مىس وندىردىك. ءونىمنىڭ باسىم بولىگىن شەتەلگە ەكسپورتتاۋدامىز. قازاقستاندىق وڭدەۋشى كاسىپورىندار دا الىپ جاتىر. ءقازىر ەلىمىزدەگى تەلەكوممۋنيكاتسيا، قۇرىلىس سالالارى بويىنشا ءبىزدىڭ ساپالى كاتودتى مىستى كوپتەپ پايدالانۋدىڭ جولدارى قاراستىرىلۋدا»، - قوڭىرات مىس قورىتۋ زاۋىتىنىڭ ديرەكتورى پاۆەل سەمچەنكو.
بۇعان دەيىن زاۋىت جىلىنا 10 مىڭ توننادان استام مىس ءوندىرىپ كەلدى. جاقىندا كاسىپورىننىڭ قوسپالاۋ جانە ەلەكتروليزدەۋ سەحتارى ىسكە قوسىلدى. سونىڭ كومەگىمەن ءبىر جىلدا 15 مىڭ تونناعا دەيىن ءونىم وندىرۋگە مۇمكىندىك تۋىپ وتىر. سوعان سايكەس، جاڭادان تاعى دا 30 جۇمىس ورنى اشىلدى. قازىر ءوندىرىس وشاعىندا 300 ادام تۇراقتى ەڭبەك ەتەدى. جالپى بۇل اعىلشىندىق كومپانيا ءار جىل سايىن ەلىمىزگە 6 ميلليارد تەڭگەگە جۋىق سالىق تولەيدى ەكەن. بۇل وسى وڭىردەگى كوپتەگەن كوكەيكەستى ماسەلەنى وڭ شەشۋگە مۇمكىندىك بەرىپ وتىر. بۇعان قوسا ينۆەستورلار وتكەن جىلى الەۋمەتتىك جوبالارعا دا 14 ميلليون تەڭگە قارجى ءبولىپتى.