اشىنعان جۇرتتىڭ ايتۋىنشا، سالىنۋى ءتيىس بىرنەشە تۇرعىن ءۇي كەشەنىنە 40 ميللياردقا جۋىق تەڭگەنى ساناپ بەرگەن. ەندى سوڭىندا جەر سيپاپ قالىپ وتىر، دەپ حابارلايدى ك ت ك تەلەارناسى.
«ەكسپو» قالاشىعى سالىنىپ جاتقان ماڭنان قوس- قوستان پاتەر الام دەپ دالادا قالعان ۇلەسكەرلەر كەشە مەردىگەر كومپانيانىڭ كەڭسەسىنە باسىپ كىردى. ءتىپتى سوڭى قىپ-قىزىل توبەلەسكە ۇلاسا جازدادى.
بۇل «الداندىق» دەپ اشۋعا بۋلىققان جۇرت. بارلىعى 4 مىڭنان استام ۇلەسكەر 5 جىل بۇرىن 40 ميللياردتاي تەڭگەسىن تۇرعىن ءۇي كەشەنىنە سالعان. «ازبۋكا جيليا» اتتى قۇرىلىس كومپانياسى وعان 8 بىردەي ەليتالىق ءۇي سالۋى ءتيىس بولىپتى. الايدا، جۇرت سول پاتەرلەرىنە قول جەتكىزە الماي ءالى جىلاپ ءجۇر.
«جاۋاپ بەرمەيدى، اقشا جوق دەيدى. ءالى قۇرىلىس جۇرمەي جاتىر»، - دەيدى الاڭداۋلى جاڭابەك جۇمابەكوۆ ەسىمدى ۇلەسكەر.
«بوس تۇر» دەپ ايتقان جەر «ەكسپو» قالاشىعىنىڭ ءدال قاسىندا ورنالاسقان. قورشالعان قۇرىلىس الاڭىندا قالقيىپ تۇرعان ءبىر كراننان باسقا تەحنيكا جوق. ال، كەلىسىم- شارتقا سايكەس ۇلەسكەرلەر پاتەر كىلتىن بىلتىر الۋى كەرەك ەكەن.
«مەن 2 پاتەرگە 110 مىڭ دوللار بەردىم. مەنىڭ جولداسىم قايتىس بولدى. كۇندە كەلەمىز، وسىلاي ەسىكتى اشپايدى. ەگەر جاقسى كومپانيا بولسا، شىعىپ نەگە جوندەرىن ايتپايدى؟»، - دەيدى كەلەسى ۇلەسكەر زويا بيجانوۆا.
ۇلەسكەرلەردىڭ كوپشىلىگى نەسيەگە قىرۋار قارجى الىپتى. ەندى سول قارىزدارىن دا قايتارا الماي دىڭكەلەپ وتىر. سوندىقتان ءتوزىمى ابدەن شەگىنە جەتكەن جۇرت بۇگىن مەردىگەر كومپانيانىڭ كەڭسەسىنە باسىپ كىرۋگە ءماجبۇر بولدى.
«اقشامىز قايدا؟ جاۋاپ بەر»
الايدا جۇرتتى سىرتتا ساعاتتاپ تۇرعىزىپ، اقىرى ۇستالعان كومپانيا وكىلى بۇل جولى ۇيرەنشىكتى ۋادەسىن دە بەرۋگە جارامادى. جان جاقتان جاۋعان سۇراقتىڭ بىرىنە دە ءلام-ميم دەمەگەن قىزمەتكەر اقىرى جاۋاپتان سىتىلىپ كەتتى.
- ادامدار سۇراق قويىپ جاتىر عوي سىزگە! ءسىز نەگە مىسقىلداپ كۇلىپ تۇرسىز.
وسىلايشا، ميلليونداردى جيناپ الىپ، ۇلەسكەرلەردى تەنتىرەتكەن كومپانيا ماردىمدى جاۋاپ قاتپادى. ال، ابدەن ىزاعا بۋلىققان مىڭداعان ادام الداپ سوققان كومپانيانى سوتقا بەرمەك. ءارى بۇل ىسكە ۇكىمەتتىڭ دە ارالاسۋىن سۇراپ، قول جيناپ جاتىر. الايدا، شەنەۋنىكتەر «كومەك كۇتپەڭدەر» دەپ اشىعىن ايتتى.
«بۇل وتە قيىن جاعداي. قالا دا كومەكتەسكىسى كەلىپ وتىر. ءبىراق بۇل ماسەلەنى تەك «ازبۋكا جيليانىڭ» ءوزى شەشۋى ءتيىس. ويتكەنى بۇل جەردە ۇكىمەتتەن قارجى ءبولىنىپ، كومەك كورسەتىلەدى دەگەن ءسوز جوق»، - دەيدى استانا قالالىق ساۋلەت-قۇرىلىس باقىلاۋ باسقارماسى باسشىسىنىڭ ورىنباسارى مۇرات دولانبەكوۆ.
سوندىقتان مىڭداعان ۇلەسكەرگە سوتتاسۋدان باسقا امال جوق. وندا دا 40 ميللياردتىڭ ەندى قايتا قويۋى ەكىتالاي.