قىزىلوردادا شەتەلدەگى قازاق بالالارىنا ارنالعان حالىقارالىق وليمپيادا باستالدى - فوتو
داستۇرگە اينالعان وليمپياداعا رەسەي، وزبەكستان، يران، تۇرىكمەنستان، قىتاي، موڭعوليا سياقتى الىس- جاقىن شەت ەلدەردەن تالانتتى جاستار قاتىسۋدا. وليمپيادانىڭ اشىلۋ سالتاناتىمەن وبلىس اكىمى قىرىمبەك كوشەربايەۆ قۇتتىقتاپ، الداعى حالىقارالىق ءبىلىم دوداسىنا قاتىساتىن جاستارعا ساتتىلىك تىلەدى.
- بۇگىنگى سىر ەلىندە وتكەلى وتىرعان حالىقارالىق وليمپيادانىڭ باستى ماقساتى - الەمنىڭ ءار ەلدەرىندە تۇراتىن قازاق جاستارىنىڭ دوستىق بايلانىستارىن نىعايتۋعا ىقپال ەتۋ، قازاق ءتىلىن مەڭگەرۋ مادەنيەتىنىڭ دەڭگەيىن كوتەرۋ جانە تاريحقا، تاريحي وتانىمىزدىڭ قازىرگى دامۋىنا قىزىعۋشىلىقتارىن ارتتىرۋ. ءارى، تالانتتى جاستارعا قولداۋ كورسەتۋ بولىپ تابىلادى، - دەي كەلە ايماق باسشىسى ءبىلىم دوداسىندا باق سىنايتىن جاس ءتىل جاناشىرلارىنا ءاردايىم قولداۋ كورسەتىلەتىنىن جەتكىزدى.
ق ر ءبىلىم جانە عىلىم مينيسترلىگى «دارىن» رەسپۋبليكالىق عىلىمي- پراكتيكالىق ورتالىعىنىڭ ديرەكتورى شولپان قيرابايەۆا شەت مەملەكەتتەردە تۇراتىن وتانداستاردى قولداۋ ماقساتىندا اتالمىش وليمپيادانىڭ 2004 -جىلدان بەرى وتكىزىپ كەلە جاتقانىن ايتتى.
وليمپيادا شارتىنا سايكەس شەتەلدەردەگى 8-11 - سىنىپتا وقيتىن 20 جاسقا دەيىنگى وقۋشىلار جارىسقا قاتىسا الادى.
اشىلۋ سالتاناتىندا قازىلار القاسى تانىستىرىلىپ، ءبىلىم دوداسىنىڭ 26 - ماۋسىمعا دەيىن جالعاساتىنىن ايتتى. جارىس جەڭىمپازدارىنا مەملەكەتتىك جانە ج و و- نىڭ ارنايى گرانتتارى بەرىلەدى.