اگەنتتىكتىڭ مالىمەتىنشە، حايرۋللوجون ماتانوۆ (Khairullozhon Matanov) تەرگەۋدەن اقپاراتتى جاسىرعانى ءۇشىن 2,5 جىلعا باس بوستاندىعىنان ايىرىلدى. ايىپتاۋشىلاردىڭ تۇجىرىمى بويىنشا، ماتانوۆ تەراكت جاسالعان كۇنى اعايىندى سارنايەۆتارمەن كەزدەسىپ، كەشكى اس ىشكەن. الايدا ول بۇل تۋرالى تەرگەۋشىلەرگە ءتىس جارماپتى.
«سونىمەن قاتار، ماتانوۆتىڭ سارنايەۆپەن تانىس ەكەنىن كۋالاندىراتىن ماتەريالداردى ءوز كومپيۋتەرىنەن جويىپ جىبەرگەنى انىقتالدى. قىرعىستاننان ا ق ش-قا جەتكىزىلگەن ماتانوۆ ءوز كىناسىن مويىنداپ، تەرگەۋمەن كەلىسىم جاساستى»، - دەپ حابارلايدى اگەنتتىكتەگىلەر.
بەيسەنبى كۇنى بولعان سوتتا ول تەرگەۋگە جالعان سويلەگەنى ءۇشىن كەشىرىم سۇراپ، بۇل قىلىعىن قاتەلىك دەپ اتادى. ال بۇل ءىستى جۇرگىزگەن سۋديا ۋيليام يانگ ونىڭ لاڭكەستىك تۋرالى بىلمەگەنىن راستادى. «سەن جارىلىستىڭ دايىندالىپ جاتقانى تۋرالى بىلمەدىڭ، ءبىراق بىزگە سەنىڭ كومەگىڭ عانا كەرەك ەدى»، - دەدى سۋديا.
ەسكە سالا كەتەيىك، دجوحار سارنايەۆ اعاسى تامەرلانمەن بىرگە 2013 -جىلعى بوستون مارافونى كەزىندە جارىلىس ۇيىمداستىرىپ، ونىڭ سالدارىنان ءۇش ادام قايتىس بولعان ەدى، تاعى 260 ادام جاراقات الدى. ال دجوحار سارنايەۆ پوليتسيانىڭ ارنايى ءىس-قيمىلى بارىسىندا قولعا ءتۇسىپ، وعان 30 پۋنكت بويىنشا ايىپ تاعىلدى. تامەرلان 19 -ساۋىردە پوليتسيامەن اتىسىپ، قازا تاپتى. ال مامىر ايىندا ا ق ش القا سوتى دجوحار سارنايەۆتى 2013 -جىلى ءساۋىر ايىندا بوستونداعى مارافون كەزىندە لاڭكەستىك جاساعانى ءۇشىن ءولىم جازاسىنا كەستى.
ال بۇل ىسكە قاتىسى بار قازاقستاندىق ستۋدەنتتەر دياس قادىربايەۆ پەن ازامات ءتاجاياقوۆ امەريكالىق سوتتىڭ الدىنا 2013 -جىلدىڭ ءساۋىر ايىندا بولعان بوستونداعى لاڭكەستىككە كەدەرگى كەلتىردى دەگەن ايىپپەن كەلگەن بولاتىن. ازامات ءتاجاياقوۆ 3,5 جىلعا باس بوستاندىعىنان ايىرىلعان. 2 -ماۋسىمدا دياس قادىربايەۆ امەريكالىق سوت تورەلىگىنە كەدەرگى كەلتىرگەنى ءۇشىن التى جىلعا سوتتالعان ەدى. سوتتا ول ءوز تانىسى سارنايەۆتى تانىعاننان كەيىن پوليتسياعا تەلەفون سوقپاعانىن مويىندادى.
سونىمەن قاتار، دياس قادىربايەۆ سارنايەۆتىڭ جاتاقحاناداعى بولمەسىنەن زاتتاردى جيناعانىن، وسىلايشا تەرگەۋگە كەدەرگى كەلتىرگەنىن مويىندادى.