الماتىداعى «سايران» كولى جۋىردا ادام تانىماستاي بولىپ وزگەرەدى

استانا. قازاقپارات - الماتىدا «سايران» كولى جۋىردا ادام تانىماستاي بولىپ وزگەرەدى، - دەپ حابارلايدى «الماتى» تەلەارناسى.

تىلشىلەردىڭ مالىمەتىنشە، «قوقىسقا قاقالعان «سايران» كولى جۋىردا جاڭعىرادى». قولاڭسا ءيىس مۇڭكىگەن اۋماق 20 مىڭ ادامعا شاقتالعان الىپ دەمالىس ورنىنا اينالماق.

سونىمەن قاتار، حالىقتىڭ جازدا «سايرانعا» بارىپ، جاعاجاي جاعالايتىنى، ەسكەكپەن قايىق ەسەتىنى ايتىلادى. ال قىستا قاتقان كولدىڭ بەتىمەن سىرعانايدى ەكەن. الماتى قالالىق ساۋلەت جانە قالا قۇرىلىسى باسقارماسى باسشىسىنىڭ ورىنباسارى جانات ايتىلەۋدىڭ ايتۋىنشا، «سايران» ەلىمىزدەگى تۇڭعىش جاساندى ارالعا اينالادى.

«سايران» كولىنە بىرىنشىدەن ۇلكەن الماتى وزەنى قوسىلادى. قوسىلاتىن جەرگە ءارتۇرلى سۇزگى قويىلىپ، سۋ 3 ماقساتتا پايدالانىلادى. ياعني، ادام شومىلاتىن سۋ تازا بولۋى كەرەك. سودان كەيىن جاسىل جەلەكتەردى سۋعارۋعا جۇمسالادى، تەحنيكالىق ماقساتتا جۇمسالىنادى»، - دەدى جانات ايتىلەۋ.

جوسپار بويىنشا، سايران كولىنىڭ جاعالاۋىندا 1500 كولىككە ارنالعان اۆتوتۇراق جانە بالالار اتراكسيوندارى تۇرعىزىلادى. بۇل ويىن الاڭدارى تەك جازدا عانا ەمەس، قىس كەزىندە دە جۇمىس ىستەيدى. ەگەر جوبا بيىل ماقۇلدانسا، ارالدىڭ قۇرىلىس جۇمىستارى كەلەر جىلى باستالاتىن بولىپتى.