ماسكەۋدەگى رامازان شاتىرىندا مۇسىلمان حالىقتارىنىڭ كەشتەرى وتەدى

استانا. قازاقپارات - قاسيەتتى رامازان ايىنىڭ قارساڭىندا، سارسەنبى كۇنى ماسكەۋدەگى تاعزىم تاۋىندا اشىلعان رامازان شاتىرى بۇگىن تاڭدا العاشقى قوناقتارىن قابىلداي باستايدى، دەپ حابارلايدى ت ا س س.

شاتىردىڭ ەسىگى وسى اي بويى وسىمەن ەكىنشى جىل قاتارىنان كەلۋشىلەر ءۇشىن كۇنى-ءتۇنى اشىق بولماق. مۇندا 18 مىڭعا دەيىن ادامدى قابىلداۋ جوسپارلانىپ وتىر. ولار ءۇشىن ءتۇرلى تاعامدار ازىرلەنىپ، رەسەيلىك رەسپۋبليكالاردىڭ باسشىلارىمەن جانە يسلام ەلدەرىنىڭ ەلشىلەرىمەن كەزدەسۋلەر، قۇران وقۋدان حالىقارالىق جارىس ءتارىزدى شارالار وتكىزۋ قاراستىرىلىپ وتىر.

«ۇلتىنا، دىنىنە قاراماستان، بارلىق كەلۋشىلەر شىعىس تاعامدارىنان ازىرلەنگەن مەرەكەلىك كەشكى اسقا شاقىرىلىپ، رەسەي حالىقتارىنىڭ مادەنيەتىمەن تانىسا الادى»، دەپ حابارلادى ۇيىمداستىرۋشىلار.

رەسەيدىڭ مۇفتيلەر كەڭەسىنىڭ باسپا ءسوز قىزمەتىندە ءار كەش سايىن رامازان شاتىرىندا ەرەكشە شارالار ۇيىمداستىرىلاتىنىن، بيىل قىرىم رەسپۋبليكاسىنىڭ، ۇندىلىك مۇسىلمانداردىڭ جانە سىعان مۇسىلماندارى قاۋىمىنىڭ كەشتەرى وتەتىنىن حابارلادى.

سونداي-اق ادامدارعا دەگەن سۇيىسپەنشىلىك، كەشىرىمدىلىك، مەيىرباندىلىق، العىس ءبىلدىرۋ، توزىمدىلىك، جومارتتىق، ادالدىق جانە ت. س. س. يماندىلىق قاسيەتتەردىڭ ءارقايسىسى ءبىر-ءبىر كەشتىڭ تاقىرىبىنا اينالماق