اتىراۋدا ستۋدەنتتەر ورتا عاسىردا ءومىر سۇرگەن جاۋىنگەردىڭ قورىمىن تاپتى - فوتو
15:35, 17 - ماۋسىم 2015
اتىراۋ. قازاقپارات - اتىراۋ وبلىسى يندەر اۋدانىنىڭ تەرەكتى جەرىندە ورتا عاسىردا جەرلەنگەن جاۋىنگەردىڭ قورىم تابىلدى.
«قازبا جۇمىستارىن جازعى تاجىريبە كەزىندە اتىراۋ مەملەكەتتىك ۋنيۆەرسيتەتىنىڭ ستۋدەنتتەرى، بولاشاق تاريحشىلار وتكىزدى. قورىمدى ەرەكشە دەپ اتاۋعا بولادى. جاۋىنگەرمەن بىرگە ونى جىلقىسى دا بىرگە جەرلەنگەن. سونداي-اق، قابىردىڭ ىشىندە ۇزىندىعى 1 مەتردەي قىلىش، جەبە ۇشتارى، ۇزىندىعى 1 مەتردەن اساتىن ساۋىت، ەر-تۇرمان ەلەمەنتتەرى بولعان. تەمىر ساۋىتتىڭ 20 كەلىلىك سالماعىنا قاراعاندا، ول اتتى قورعاۋعا ارنالعان.
«ارحەولوگتار تاپقان بارلىق ماتەريالدار IX- XI عاسىرلارداعى وعىز داۋىرىنە جاتادى. سەبەبى، ات ساۋىتتارىن تەك وعىز تايپالارى عانا جاساعان»، - دەپ حابارلادى ارحەولوگيانىڭ وقۋ-عىلىمي زەرتحاناسىنىڭ مەڭگەرۋشىسى، ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ارحەولوگيا- ەتنوگرافيا مۇراجايىنىڭ ديرەكتورى ءانيا ەرماعامبەتوۆا.