شىمكەنتتەگى جاڭا تۋىلعان سابيلەردى ساتۋ ءىسى: تاعى ەكى ايەل سوتتالدى
ەسكە سالا كەتەيىك، بۇعان دەيىن و ق و №1 پەريناتالدىق ورتالىعىندا 2012-2013 -جىلدارى جاڭا تۋىلعان سابيلەردىڭ ساتىلعانى انىقتالعان بولاتىن.
«قازاقستاننىڭ ەكى ازاماتشاسى ۇستالدى، ەكەۋى دە جەرگىلىكتى تۇرعىندار. ولاردىڭ جۇمىسسىز ەكەنى بەلگىلى بولدى. ءبىز ولاردىڭ مەديتسينالىق قىزمەتكەر بولعاندارى تۋرالى دەرەكتى تولىق الىپ تاستايمىز»، - دەدى ەڭبەكشى اۋداندىق پروكۋرورىنىڭ ورىنباسارى دوسىمحان ايتىشەۆ. ايەلدەردىڭ نارەستەلەردى ساتۋ كەزىندە دەلدال بولعانى انىقتالدى. بالالى بولعىسى كەلگەندەر سول ايەلدەر ارقىلى مەديتسينالىق قىزمەتكەرلەرگە شىعىپ وتىرعان.
پروكۋراتۋراداعىلاردىڭ ايتۋىنشا، ولاردىڭ تىزبەگىن تولىقتاي انىقتاۋ ازىرشە مۇمكىن بولماي تۇر. قۇقىق قورعاۋ ورگاندارى قىزمەتكەرلەرىنىڭ ايتۋىنشا، ۇستالعان ايەلدەر پەريناتالدىق ورتالىقتىڭ قىزمەتكەرلەرىمەن تىكەلەي تانىس بولماعان. دەلدال ايەلدەر ءوز قىزمەتتەرى ءۇشىن ءار كەلىسىم جاسالعان سايىن 50 مىڭ تەڭگەدەن العان. ايەلدەر كىنالارىن جارتىلاي مويىندادى.
بۇعان دەيىن نارەستەلەردى ساتۋعا قاتىسقان پەريناتالدىق ورتالىقتىڭ ەكى قىزمەتكەرى ۇستالعان بولاتىن. تەرگەۋدىڭ مالىمەتىنشە، ولار بەلگىلى ءبىر ۋاقىت ىشىندە بالاسىز وتباسىلارعا، انالارى بوسانا سالىپ باس تارتقان سابيلەردى ساتىپ وتىرعان.
سابيلەردىڭ قۇنى 1 دەن 3 مىڭ دوللارعا دەيىنگى ارالىقتا بولعان. قازىرگى تاڭدا وسىنداي 10 دەرەك انىقتالدى.