جەكە سوت ورىنداۋشىلارىنىڭ دا ءرولىن ارتتىرۋ كەرەك
وسىنى تولىق قولدايمىن. بۇل تۋرالى جەكە سوت ورىنداۋشىسى ءۋالي دۇيسەنعاليەۆ ءمالىم ەتتى.
ونىڭ ايتۋىنشا، 2010 -جىلدىڭ 2 -ساۋىرىندە مەملەكەت باسشىسى «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭعا قول قويدى.
وسىعان وراي 2011 -جىلدان باستاپ، ەلىمىزدىڭ تۇكپىر- تۇكپىرىندە جەكە سوت ورىنداۋشىلار ىسكە كىرىستى. باتىس قازاقستان وبلىسىندا كۇنى بۇگىن جيىرما شاقتى جەكە سوت ورىنداۋشىسى حالىققا قىزمەت كورسەتۋدە.
«شىندىعىن ايتقاندا، جەكە سوت ورىنداۋشىلار جۇمىسى سوڭعى 2-3 جىل شاماسىندا عانا پايدا بولدى، سوندىقتان ولاردىڭ جۇمىسىن رەتتەۋ باعىتىندا ءپىسىپ- جەتىلمەگەن تۇستار ءالى كوپ. مەنىڭشە، جەكە سوت ورىنداۋشىلارىمەن بىرگە مەملەكەتتىك سوت ورىنداۋشىلارىنىڭ دا جۇمىس جاساعانى ءجون. ولار مەملەكەت پايداسىنا وندىرىلەتىن اتقارۋ پاراقتارىمەن جۇمىستانسا، ەل قورجىنىنا ءبىرشاما قاراجات تۇسەر ەدى. ءبىز سەكىلدى جەكە سوت ورىنداۋشىلارى دا تاپقان تابىسىنىڭ 10 پايىزىنان مەملەكەتكە سالىق تولەپ، ەل بيۋدجەتىن تولىقتىرۋعا ءوز ۇلەسىن قوسىپ ءجۇر.
جەكە سوت ورىنداۋشىلارىنىڭ جۇمىسىن جەتىلدىرۋ باعىتىندا مەن مىنانى ايتار ەدىم. قازىرگى قولدانىستاعى زاڭ بويىنشا سوت شەشىمىن ورىنداماعانداردى اكىمشىلىك جازاعا وزدىگىمىزدەن تارتۋعا ءبىزدىڭ قۇقىعىمىز جوق. سوعان وراي زاڭعا قايشى ارەكەت جاساعانداردى اكىمشىلىك جازاعا تارتۋ جونىندە مەملەكەتتىك سوت ورىنداۋشىلارىنا حات جازىپ، ولارعا قۇجاتتاردى جولدايمىز. مەملەكەتتىك سوت ورىنداۋشىلارى ءبىزدىڭ قۇجاتتارىمىزدى نەگىزگە الا وتىرىپ، ولاردى اكىمشىلىك جازاعا تارتۋ جونىندە حاتتاما تولتىرادى.
مىنە، وسى ۇدەرىس جۇمىستىڭ تەز جۇرۋىنە كەدەرگى كەلتىرەدى. جەكە دەگەن اتى بولماسا، اتقارىپ وتىرعان قىزمەتىمىز بەن جۇمىسقا قويىلاتىن تالاپ بىردەي. ولاي بولسا، جەكە سوت ورىنداۋشىلارىنا سوت شەشىمىن ورىنداماعانداردى اكىمشىلىك جاۋاپقا تارتۋ قۇقىعى نەگە بەرىلمەيدى؟ تاعى ءبىر ايتا كەتەتىن ءجايت، سوت شەشىمىن ورىنداۋ بارىسىندا ءبىز بورىشكەردىڭ دۇنيە- مۇلكىن انىقتاۋ ءۇشىن ەلەكتروندى سۇراۋ سالا الماي ءجۇرمىز، ويتكەنى بۇل باعىتتاعى جۇمىس ءالى دۇرىس جولعا قويىلماعان. ەلەكتروندى سۇراۋ سالۋ جۇمىسى ءبىر قالىپقا تۇسسە، ءبىز سەكىلدى سوت ورىنداۋشىلارى ءۇشىن ۇلكەن كومەك بولار ەدى.
جالپى، مەن جەكە مەنشىك سوت ورىنداۋشىلار ينستيتۋتىن ودان ءارى جەتىلدىرۋ كەرەك دەگەن پىكىردى قولداي وتىرىپ، سوت جۇيەسىنە دامىعان ەلدەردەگىدەي وزگەرىستەر مەن تولىقتىرۋلار ەنگىزىلۋى ءتيىس دەپ ويلايمىن. زاڭعا مۇنداي وزگەرىستەردى ەنگىزۋ ءۇشىن جەرگىلىكتى مامانداردىڭ ۇسىنىس- پىكىرلەرى دە ەسكەرىلۋى كەرەك»، - دەدى ۋ. دۇيسەنعاليەۆ.
اۆتور: ەلجان ەرالى