قىتايدا قازاقستاندىق ستۋدەنتتەردىڭ ءتورتىنشى قۇرىلتايى بولىپ ءوتتى - فوتو
شاراعا KSAC قازاقستاندىق ستۋدەنتتەردىڭ ءبىرىڭعاي ۇيىمى قىزمەت اتقارىپ وتىرعان قىتايدىڭ بەيجىڭ، شاڭحاي، نانكين، ءۇرىمجى، ۋحان، چۋنتسين، داليان، گۋانجوۋ سياقتى ءىرى قالالارىنان 60 تان استام دەلەگات قاتىستى.
قۇرىلتاي اياسىندا ونىڭ قاتىسۋشىلارى «قازاقستان-2050» ستراتەگياسى، «نۇرلى جول» ەكونوميكالىق باعدارلاماسى، سونداي-اق «بەس ينستيتۋتسيونالدىق رەفورمانى ىسكە اسىرۋ بويىنشا 100 ناقتى قادام» ۇلت جوسپارىن ىسكە اسىرۋداعى جاستاردىڭ قاتىسۋىن، قىتايداعى قازاقستاندىق ستۋدەنتتەردىڭ پروبلەمالىق ماسەلەلەرى، ق ح ر- دا ستۋدەنتتىك ءوزىن-ءوزى ۇيىمداستىرۋدى ودان ءارى دامىتۋ، سونىڭ ىشىندە KSAC ۇيىمىنىڭ قازاقستاننىڭ جاستار ۇيىمدارىمەن جانە «قازاليانس» شەتەلدەگى قازاقستاندىق ستۋدەنتتەر بىرلەستىگىمەن ءوزارا ىقپالداسۋ ماسەلەسى ورتاعا سالىنعان ستۋدەنتتىك كونفەرەنتسيا بولىپ ءوتتى.
KSAC جانە «قازاليانس» شەتەلدەگى قازاقستاندىق ستۋدەنتتىك ۇيىمدارىنىڭ بىرلەستىگى اراسىندا ودان ءارى ىنتىماقتاسۋ جانە ءوزارا ىقپالداسۋ تۋرالى بىرلەسكەن دەكلاراتسياعا قول قويىلدى.
ءداستۇر بويىنشا قۇرىلتاي اياسىندا ۋحان قالاسىندا ءبىلىم الىپ جاتقان ستۋدەنتتەر ۇيىمداستىرعان مەرەكەلىك كونسەرت بولىپ ءوتتى، وندا نانكين جانە ۋحان قالالارىندا وقيتىن ستۋدەنتتىك كوڭىلدى تاپقىرلار كوماندالارى ونەر كورسەتتى.
قۇرىلتايدىڭ ۇيىمداستىرۋشىلارى مەن قاتىسۋشىلارى حالىقارالىق باعدارلامالار ورتالىعىنىڭ جانە قازاقستان رەسپۋبليكاسىنىڭ ق ح ر- داعى ەلشىلىگىنىڭ العىسحاتتارىمەن جانە سەرتيفيكاتتارىمەن ماراپاتتالدى.
«قازىرگى ۋاقىتتا قازاقستان جاستارى ءبىزدىڭ ەلىمىزدە وتكىزىلىپ وتىرعان رەفورمالار مەن دامۋ باعدارلامالارىنا بەلسەندى اتسالىسۋدا. وتانىمىزدان قاشىق جۇرگەن ءبىز، قازاقستاندىق ستۋدەنتتەر ءۇشىن ەلدە بولىپ جاتقان وقيعالاردىڭ بارىنەن حاباردار بولىپ، مەملەكەت باسشىسىنىڭ باستامالارىن ىسكە اسىرۋعا ۇلەس قوسۋ ماڭىزدى»، - دەدى قازاقپارات تىلشىسىنە بەرگەن سۇحباتىندا ۋحان ۋنيۆەرسيتەتىنىڭ ستۋدەنتى، KSAC ۇيىمىنىڭ ۋحان قالاسىنداعى ءتوراعاسى عازيز جۇمابايەۆ.
ول قىتايداعى ستۋدەنتتەردىڭ جىل سايىن وتكىزىلەتىن قۇرىلتايى ماڭىزدى وقيعالاردىڭ ءبىرى ەكەنىن اتاپ ءوتتى. مۇندا ستۋدەنتتەر ءبىر-بىرىمەن تانىسىپ، پروبلەمالاردى تالقىلاپ قانا قويماي، «قازاقستان-2050» جانە «نۇرلى جول» باعدارلامالارى سياقتى ماڭىزدى مەملەكەتتىك ماسەلەلەرگە قاتىستى پىكىر الماسىپ، يدەيالارىن ۇسىنا الادى.
قازاقستان رەسپۋبليكاسىنىڭ ق ح ر- داعى ەلشىلىگىنىڭ ءبىلىم بويىنشا كەڭەسشىسى مارعۇلان كۇزەكبايەۆتىڭ ايتۋىنشا، قازاقستاندىق ستۋدەنتتەردىڭ جىل سايىنعى قۇرىلتايى ەلشىلىك جانە حالىقارالىق باعدارلامالار ورتالىعىنىڭ ءوزىن-ءوزى ۇيىمداستىرۋ، قىتايداعى ستۋدەنتتەردى بىرىكتىرۋ جانە پاتريوتتىق تاربيەلەۋ جۇمىسى اياسىنداعى ماڭىزدى جوبالاردىڭ ءبىرى بولىپ تابىلادى.