ق ر پرەزيدەنتى نازاربايەۆ ۋنيۆەرسيتەتىنىڭ تۇلەكتەرىن استانادا قۇرىلاتىن قارجى ورتالىعىندا قىزمەت ەتۋگە شاقىردى
«جولدىڭ ار جاق بەتىندە ەكسپو-2017 كورمەسىنىڭ عيماراتتارى سالىنىپ جاتقانىن كورىپ وتىرسىزدار. حالىقارالىق كورمە اياقتالعاننان كەيىن بۇل جەردە دۇنيەجۇزىلىك قارجى ورتالىعىن سالۋ تۋرالى جارلىققا قول قويدىم. ول الەمنىڭ ەڭ تاڭداۋلى قارجى ورتالىقتارىنىڭ ستاندارتى بويىنشا جۇمىس ىستەيتىن بولادى. ءىس- قاعازدارىنىڭ بارلىعى اعىلشىن تىلىندە بولادى، سوت ءىسىن جۇرگىزۋ اعىلشىن تىلىندە بولادى. ول ورتالىق وتاندىق ەكونوميكانىڭ ەڭ باستى لوكوموتيۆىنىڭ بىرىنە اينالادى. ۋنيۆەرسيتەتتىڭ جانىندا سالدىرىپ جاتقانىمنىڭ دا ءبىر ءمانى بار. ونىڭ جۇمىسىن جانداندىرۋعا وسى ۋنيۆەرسيتەتتىڭ تۇلەكتەرى ءوز ۇلەسىن قوسادى دەپ سەنەمىن»، - دەدى پرەزيدەنت تۇلەكتەرگە قاراتىپ ايتقان سوزىندە.
وسى ورايدا ەلباسى نازاربايەۆ ۋنيۆەرسيتەتى «ەكسپو» كورمەسىنە جانە بولاشاق قارجى ورتالىعىنىڭ ىرگەلەس بولۋى بەكەر ەمەس ەكەندىگىن اتاپ ءوتتى.
«سەندەر الەمدىك ءبىلىم ورداسىندا وقىپ، الەمدىك قارجى ورتالىعىندا ەڭبەك ەتەتىن بولاسىڭدار. ءبىز سەندەردىڭ الاڭسىز ءبىلىم الىپ، قالاعان كاسىپتەرىڭنىڭ شىڭىنا جەتۋلەرىڭ ءۇشىن بارلىق جاعدايدى جاسادىق. بۇكىل ەڭبەگىمىزدى، ەرىك- جىگەرىمىزدى ۇرپاقتىڭ بولاشاعى ءۇشىن سارپ ەتۋدەمىز. تاۋەلسىزدىك جىلدارىنداعى ەڭ قيىن كەزەڭگە قاراماي قولعا العانىمىز- ول جاستارعا ءبىلىم بەرۋ»، - دەدى مەملەكەت باسشىسى.
اۆتور: رۋسلان عابباسوۆ