ماگاتە قازاقستانداعى يادرولىق بانكتىڭ قورىن بيىلدان باستاپ تولتىرا الادى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە قازاقستان رەسرۋبليكاسى ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتى ءتوراعاسىنىڭ ورىنباسارى تيمۋر جانتيكين ءمالىم ەتتى.
«بۇل جوبانى جۇزەگە اسىرۋ بويىنشا دايىندىق جۇرگىزىلىپ جاتىر. بانك جۇمىسى مەن قاۋىپسىزدىگى ماگاتە ۇسىنىستارىنا سايكەستەندىرىلۋدە. تومەن بايىتىلعان ۋراندى ساتۋ پروتسەسىنە شىعۋ ەكى جىل الۋى مۇمكىن. نورماتيۆتىك بازانى جەتىلدىرۋ كەرەك. جاڭا زاڭدى كۇتىپ وتىرمىز. زاڭدىق اكتىلەر شىعادى. ۇكىمەتتىك ورگانداردىڭ ينفراقۇرىلىمى جەتىلدىرىلەدى.
ۋراندى ساتۋ مەرزىمىنە كەلەتىن بولساق، شامامەن ەكى جىل كەتەدى. تەحنيكالىق ميستسيالاردان كەيىن، يادرولىق بانكتىڭ قاۋىپسىزدىك تالاپتارىنا سايكەستىگىن بەكىتەدى. سول كەزدەن باستاپ ماتەريالدار ساتىلا باستايدى. ال تومەن بايىتىلعان ۋراندى بانك قورىنا ساتىپ الۋ ماگاتە- مەن بيىل باستالۋى ىقتيمال. ۇكىمەت پەن ماگاتە اراسىندا ارنايى كەلىسىم قابىلدانۋى كەرەك. سودان كەيىن بانككە ماتەريالدى ساتىپ الۋدى باستاي الادى. ساتىپ الۋ اشىق تەندەرمەن وتكىزىلەدى. بارلىعى زاڭدى بولۋى ءۇشىن قاداعالانىپ وتىرىلادى. تەندەرگە كەز كەلگەن كومپانيالار قاتىسا الادى. ول بۇكىلالەمدىك تەندەر»، - دەپ اتاپ ءوتتى ت. جانتيكين.
ايتا كەتەيىك، قازاقستاندا تومەن بايىتىلعان ۋران بانكىن قۇرۋ تۋرالى كەلىسىمگە قول قويۋ بيىل قازاقستاندا تامىز ايىنىڭ اياعىندا يادرولىق سىناقتارعا ءىس- قيمىلدىڭ حالىقارالىق كۇنى قارساڭىندا اگەنتتىكتىڭ باس ديرەكتورى يۋكيو امانونىڭ قاتىسۋىمەن وتەدى دەپ جوسپارلانۋدا. بانككە قاتىستى حالىقارالىق اتوم ەنەرگياسى اگەنتتىگىمەن كەلىسسوزدەر قازاقستاننىڭ بارلىق مۇددەلى مەملەكەتتىك ورگاندارىمەن بىرلەسە 4 جىل بويى جۇرگىزىلدى. بانك وسكەمەندە ءۇلبى مەتاللۋرگيالىق زاۋىتى اۋماعىندا ورنالاسادى. بايىتىلعان ۋران ماگاتە- گە قارايتىن بولادى. بانكتىڭ قۇرىلۋى بارشا الەمدە ۋراندى بەيبىت ماقساتتا قولدانۋعا مۇمكىندىك بەرەدى.
اۆتور: جاسۇلان جولدىبايەۆ