نازاربايەۆ ۋنيۆەرسيتەتىنىڭ العاشقى تۇلەكتەرىنە ديپلوم تاپسىرىلدى
2010-جىلى قازاقستان پرەزيدەنتىنىڭ باستاماسىمەن قۇرىلعان بۇل وقۋ ورنى وتاندىق ءبىلىم بەرۋدىڭ ۇزدىك ۇلگىسى بولىپ تابىلادى. بيىل ۋنيۆەرسيتەتتى 446 تۇلەك ءتامامداپ وتىر. ستۋدەنتتەر كوبىنەسە گۋمانيتارلىق جانە الەۋمەتتىك عىلىمدار مەكتەبىندە، عىلىم جانە تەحنولوگيالار مەكتەبىندە، ينجەنەريا مەكتەبىندە، جوعارى بيزنەس مەكتەبىندە، جوعارى مەملەكەتتىك ساياسات جانە جوعارى ءبىلىم بەرۋ مەكتەپتەرىندە ءبىلىم الدى.
«بۇگىن نازاربايەۆ ۋنيۆەرسيتەتىنىڭ العاش تۇلەكتەرى رەتىندە ۇلكەن ومىرگە قادام باسقالى وتىرسىزدار. سوندىقتان بۇگىنگى ايتۋلى وقيعا - ءبىز ءۇشىن ۇلكەن مەرەكە. بۇگىن ۋنيۆەرسيتەتتەگى سىزدەردىڭ سوڭعى كۇندەرىڭىز بولعانىمەن، الايدا جارقىن بولشاقتارىڭىز وسى ساتتەن باستالعالى وتىر. كەيبىرەۋلەرىڭىز عىلىم جولىن قۋساڭىزدار، قالعاندارىڭىز مەملەكەتتىك باسقارۋ نەمەسە بيزنەس جانە باسقا سالالاردا قىزمەت ىستەيتىن بولاسىزدار. ءبىراق تا بولاشاقتا بارشالارىڭىزدى نازاربايەۆ ۋنيۆەرسيتەتى ديپلومى بىرىكتىرەدى. بارشالارىڭىزدى وسى بۇگىنگى ايتۋلى ماڭىزدى كۇنمەن قۇتتىقتايمىن!» - دەدى ق ر ءبىلىم جانە عىلىم ءمينيسترى اسلان ءسارىنجىپوۆ.
مينيستر قۇتتىقتاۋ سوزىندە وقۋ ورنىنىڭ قۇرىلعان كۇنىنەن باستاپ قىزمەت ەتىپ جاتقان پروفەسسورلىق-وقىتۋشىلىق قۇرامعا العىسىن ءبىلدىردى.
تاراتىلعان مالىمەتتەرگە قاراعاندا، جالپى وقۋ ورنى اشىلعاننان بەرى جەتى مەكتەپتەگى ستۋدەنتتەر سانى 2800 گە دەيىن جەتتى. جىل سايىن 500 ادام وقۋ گرانتىنا يە بولۋدا. ماگيسترانتتار مەن دوكتورانتتار دا مەملەكەتتىك ءبىلىم بەرۋ تاپسىرىسى بويىنشا ءبىلىم الادى.
ايتا كەتەيىك، بۇگىن سونىمەن قاتار نازاربايەۆ ۋنيۆەرسيتەتىنىڭ جاڭا بەس قاباتتى عيماراتى اشىلدى. بۇل نىسان ەلوردانىڭ تۇران كوشەسى بويىندا ورنالاسقان.
اۆتور: رۋسلان عابباسوۆ