ورنەكتى ءابجىلان ەلدىڭ زارەسىن الدى
11:22, 13 - ماۋسىم 2015
استانا. قازاقپارات - باۋىرمەن جورعالاۋشىلار تاعى دا سەمەيلىكتەردىڭ زارەسىن الدى.
بۇل جولى جىلاندى جاعالاۋدا ستۋدەنتتەر بايقاعان.
دەگەنمەن ادامداردى كورگەن ول ءاپ-ساتتە كوزدەن عايىپ بولىپتى. بۇل - وسىمەن ەكىنشى مارتە كەزدەسىپ وتىرعان جاعداي. اپتا بۇرىن قالاداعى شاشتارازداردىڭ بىرىندە جىلان تابىلعان بولاتىن.
زوولوگ ۆيكتور حروموۆتىڭ ايتۋىنشا، بۇل ادامدارعا زيانى جوق ورنەكتى ءابجىلان بولىپ تابىلادى. ۋ شاشپايتىن تىرشىلىك يەسى كەمىرگىشتەرمەن، كەسىرتكە جانە شىركەيلەرمەن قورەكتەنەدى.
ۆيكتور حروموۆ، زوولوگ:
- بۇل جىلاننان مۇلدەم قاۋىپ جوق. ءجيى كەزدەسىپ جاتۋىنا بىرنەشە سەبەپ بار دەۋگە بولادى. تىشقان تەكتەس كەمىرگىشتەردىڭ كوبەيۋى، اۋا رايىنىڭ ىقپالى دا بولۋى مۇمكىن. باۋىرمەن جورعالاۋشىلاردىڭ بارلىعى دەرلىك تۇندە بەلسەندى قوزعالادى. قازىر ءتۇن سالقىن بولعاندىقتان، ولار كۇندىز قىزدىرىنىپ الۋ ءۇشىن ىندەرىنەن شىعۋى ىقتيمال.
www.24.kz