ءوزىڭدى باقىتتى ەتۋدىڭ امالدارى دا بار

استانا. قازاقپارات - مايو ەمحاناسىنىڭ دارىگەرى اميت سوودتىڭ ايتۋىنشا، باقىت ءۇشىن اقشا، دەنساۋلىق نەمەسە تابىس قاجەت ەمەس.

باقىتقا اپارار جول - عالىمداردىڭ 10 اپتاعا ءبولىپ، جاساپ شىعارعان ءتورت ساتىلى باعدارلاما.

اميت سوود باقىتتىڭ 40-50 پايىزى ادام جاساعان تاڭداۋىنا جانە نەنى كوزدەپ تۇرعانىنا بايلانىستى ەكەنىنە سەنىمدى، دەپ باياندايدى The Daily Mail.

ودان بۇرىن وتكىزىلگەن زەرتتەۋلەر ادام ميى جاعىمسىزدىقتى بايقاۋ ءۇشىن باعدارلامالانىپ قويىلعانىن كورسەتتى. قازىرگى زامانعى ادامداردىڭ بابالارىنا ءتىرى قالۋعا كومەكتەسكەن وسى. اميت سوودتىڭ پىكىرىنشە، ومىرگە كوزقاراستى وزگەرتۋ باقىت دەڭگەيىن ايتارلىقتاي وسىرۋگە سەپتىگىن تيگىزە الادى. ماماننىڭ باعدارلاماسى 4 ساتىدان تۇرادى.

ءبىرىنشى قادام - ويلاردى قاداعالاپ وتىرۋعا كومەكتەسەتىن جاتتىعۋ. عالىم 5-3-2 تەحنيكاسىن قولدانۋدى ۇسىنىپ وتىر. ۇيقىدان ويانعان سوڭ، ءبىرىنشى كەزەكتە ومىرلەرىڭىزگە ماڭىزدى ورىن الاتىن بەس ادام تۋرالى ويلاۋ كەرەك.

جاقىن ادامدارمەن كەزدەسۋدىڭ العاشقى ءۇش مينۋتىندا ولاردى كوپتەن بەرى كورمەگەندەي امانداسۋ قاجەت. جانە ادامدى كورگەن ساتتە العاشقى ەكى سەكۋندتا وعان ويشا بار جاقسىلىقتى تىلەڭىز. ەكىنشى قادام - العىس، راقىمدىلىق، قابىلداۋ جانە كەشىرۋ ارقىلى ەموتسيالىق تۇراقتىلىقتى دامىتۋ.

ءۇشىنشى قادام - وقۋ، جاتتىعۋ، مۋزىكا، ونەر، عيبادات ەتۋ، مەديتاتسيالاۋ جانە يوگانىڭ كومەگىمەن سانا مەن دەنەنىڭ اراسىنداعى بايلانىستى نىعايتۋ. ءتورتىنشى قادام - سالاۋاتتى ءومىر سالتى جانە جاقسى ادەتتەر، اتاپ ايتقاندا، فيزيكالىق بەلسەندىلىك پەن دۇرىس تاماقتانۋ. سونداي-اق اميت سوود ومىرگە قاراپايىم قاراۋعا كەڭەس بەرەدى. مامان باعدارلامانىڭ نەبارى ون اپتاسىنىڭ ىشىندە ويلاۋدىڭ تۇبەگەيلى وزگەرە تۇسەتىنىن ايتادى.