قازاقپارات ح ا ا مەن ۆەتنامدىق جاڭالىقتار اگەنتتىگى اراسىندا ىنتىماقتاستىق تۋرالى كەلىسىم جاسالدى
20:41, 12 - ماۋسىم 2015
استانا. قازاقپارات - قازاقستاننىڭ ۆەتنامداعى ەلشىلىگىنىڭ بەلسەندى كومەگىمەن «قازاقپارات» حالىقارالىق اقپاراتتىق اگەنتتىگى مەن ۆەتنام جاڭالىقتار اگەنتتىگى (VietnamNewsAgency, VNA) اقپارات الماسۋ سالاسىنداعى بايلانىستاردى ورناتۋ جانە دامىتۋعا باعىتتالعان ىنتىماقتاستىق تۋرالى كەلىسىمگە قول قويدى.
قازاقپارات پەن VNA ءوز ەلدەرى مەن حالىقارالىق ماڭىزى بار وقيعالار تۋرالى اقپاراتتىق جانە تالداۋ ماتەريالدارىمەن الماسۋدى جوسپارلاپ وتىر. تاراپتار مەملەكەت باسشىلارى مەن رەسمي دەلەگاتسيالاردىڭ ساپارلارى، سونداي-اق ەكى ەلدىڭ اۋماعىندا وتكىزىلىپ وتىراتىن وزگە دە مەملەكەتارالىق اكسيالار مەن شارالارعا اقپاراتتىق قولداۋ ۇيىمداستىرۋ جانە قامتاماسىز ەتۋدە تىعىز ىنتىماقتاسۋعا نيەتتى.
اگەنتتىكتەردىڭ بىرلەسكەن قىزمەتى قازاقستان مەن ۆەتنام اراسىنداعى ەلەكتروندىق اقپارات سالاسىنداعى ءوزارا ىقپالداستىعىن جان-جاقتى قولداۋعا باعىتتالماق.