ۇ ب ت-دان «جولى بولماعان قىزعا» تۇركيا اكادەمياسىنىڭ گرانتىن ۇسىنۋدىڭ ارتىندا جارناما تۇر - ب ع م
بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ءبىلىم جانە عىلىم مينيسترلىگىنىڭ ءبىلىم بەرۋ مەن عىلىم سالاسىن قاداعالاۋ كوميتەتىنىڭ ءتوراعاسى سايات ءنۇسىپوۆ وسىنداي پىكىر ءبىلدىردى.
ەستەرىڭىزگە سالا كەتەيىك، بۇعان دەيىن ۇبت تاپسىرۋ كەزىندە قىز بالاشا كيىنگەن ق ب ت ۋ ستۋدەنتى ۇستالىپ، كەيىن بۇل قازاقستاندىق قوعام اراسىندا عانا ەمەس، شەت ەلدەردە دە ۇلكەن اڭگىمەگە ۇلاسقان ەدى.
الگى قىز بيىلعى ۇ ب ت-عا جىبەرىلمەدى. ال وسى وقيعانىڭ ءمان-جايىنا قانىققان تۇركياداعى انتاليا تۋريزم اكادەمياسىنىڭ رەكتورى الگى جولى بولماعان قىزعا ءوزىنىڭ وقۋ ورداسىنان گرانتىن ۇسىناتانىن ب ا ق ارقىلى جاريالاعان بولاتىن.
«شىندىعىندا، بۇل ۇ ب ت بارىسىنداعى مەيلىنشە ءبىر قىزىق وقيعا بولدى، ءبارىمىزدىڭ، ءبىلىم جانە عىلىم مينيسترلىگىنىڭ نازارىن وزىنە اۋداردى. ال ەندى ول قىزعا گرانت بەرەتىن ماسەلەگە كەلسەك، مەن ءاربىر وقۋ ورىنى قانداي دا ءبىر وقۋشىعا گرانت بەرۋگە قۇقىعى بار دەپ ويلايمىن. تۇركيا اكادەمياسىنىڭ دا ءوز قۇقىعى بار. ەكىنشى جاعىنان، نەگە ولار بۇنداي قادامعا باردى دەگەنگە كەلسەك، مەنىڭ ويىمشا، جۇرتشىلىق جاپپاي قىزىعۋشىلىق تانىتىپ جاتقاندا بۇنداي شۋلى وقيعا ارقىلى جاعىمدى جارناما جاساۋ اركىمنىڭ نازارىن وزىنە بۇرادى. وسى وقيعانىڭ ارقاسىندا اكادەميا ءوز وقۋ ورنىنا جارناما جاساعىسى كەلگەن دە شىعار. بىرەۋلەردە قىزىعۋشىلىق پايدا بولا باستايدى. مەن بۇعان قالىپتى قۇبىلىس رەتىندە قارايمىن»، - دەدى س. ءنۇسىپوۆ.
«ارينە، بۇلاي بولىپ جاتسا، ءبىز ول قىز ءۇشىن قۋانىشتىمىز. كەمشىلىكسىز ادام بولمايدى. ول قىز ءوزىنىڭ ورنىنا جاس جىگىت قاتىساتىنىن ءبىلدى. ەندەشە، بۇنداي وقيعانى ءبىزدىڭ مينيسترلىك جاعىمسىزدىقپەن قابىلدايدى. ەكىنشى جاعىنان ول قىز ءالى جاس، مۇنداي قادامعا نە ءۇشىن بارعانى دا تۇسىنىكسىز. سوندىقتان دا، مينيسترلىك وعان تەك جاقسىلىق تىلەيدى»، - دەدى ول.
اۆتور: قانات مامەتقازى ۇلى