قازاق سپورتشىلارىنىڭ جەڭىسىن ناسيحاتتايتىن بەينەبايان دۇنيەگە كەلدى - كەسكىن

الماتى. قازاقپارات - قازاق سپورت جانە تۋريزم اكادەمياسىنىڭ ستۋدەنتى الىشەر بۇرحانوۆ «الاش ارلاندارى» اتتى جاڭا انگە بەينەبايان ءتۇسىردى.

اۆتورلار تۋىندىنىڭ قازاق سپورتشىلارىنىڭ گيمنىنە اينالارىنا سەنىمدى. ءان الدا كەلە جاتقان وليمپيادا ويىندارىنا ەلىمىزدىڭ سپورتشىلارىن رۋحتاندىرۋ ءۇشىن ارنايى تاپسىرىسپەن جازىلعان.

الىشەر بۇرحانوۆتىڭ ورىنداۋىنداعى بۇل اۋەن جاستارعا سالاۋاتتى ءومىر سالتىن ناسيحاتتاپ، تىنىش زامان باتىرلارى، ياعني اتى جەر جارعان سپورتشىلارىمىزدى شارشى الەمگە پاش ەتپەك.

«بۇل اۋەندى قازاقستان سپورتىنىڭ قاراشاڭىراعى - قازاقتىڭ سپورت جانە تۋريزم اكادەمياسىنىڭ باسشىلىعىنىڭ سۇراۋى بويىنشا جازدىم. ەلىمىزدىڭ باتىرلارىن رۋحتاندىرۋدى كوزدەپ، بەينەباياندا ايگىلى سپورتشىلارىمىزدىڭ جەڭىسكە جەتكەن ساتتەرىن كورسەتتىك»، - دەدى ءا. بۇرحانوۆ.

جاڭا تۋىندىنىڭ تۇساۋكەسەرى بۇگىن الماتىدا ساعات 20:00-دە Dubai Club تۇنگى كلۋبىندا وتەدى. شارا قازاق سپورت جانە تۋريزم اكادەمياسى مەن «V-АrtStudio» يۆەنت-اگەنتتىگىنىڭ كومەگىمەن وتپەك.

مەرەكەگە قازاقستان ەستراداسىنىڭ وكىلدەرى سەرىك يبراگيموۆ، ءالي وقاپوۆ، ايداربەك رىسبەك، ايگەرىم قالمۇراتوۆا، باقىت بيدەش، «الاش ۇلى»، نۇربولات ابدۋلين، اباي بەگەي قاتىسادى. سونىمەن قاتار اتى شىققان سپورتشىلار، وليمپيادا ويىندارىنىڭ چەمپيوندارى كەشتىڭ قۇرمەتتى قوناعى بولماق.