استاناداعى سەزد ءوزىنىڭ فورماتىن كەڭەيتۋدە - ۆيتسە-مينيستر

استانا. قازاقپارات - استاناداعى الەمدىك جانە ءداستۇرلى دىندەر ليدەرلەرىنىڭ سەزى دىنارالىق سۇحبات الاڭى رەتىندە ءوزىنىڭ حالىقارالىق مارتەبەسىن نىعايتىپ كەلەدى.

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر مادەنيەت جانە سپورت ۆيتسە-مينيسترى مارات ءازىلحانوۆ ءمالىم ەتتى.

ونىڭ سوزىنە قاراعاندا، سەزد ەندى دىني ليدەرلەردىڭ عانا ەمەس، ساياسي كوشباسشىلاردىڭ باس قوساتىن كەلەلى جيىنىنا اينالۋدا.

«بۇل سەزدىڭ ەرەكشەلىگى، بيىل ول ءوزىنىڭ فورماتىن كەڭەيتتى، وعان ءبىرقاتار مەملەكەتتەردىڭ باسشىلارى مەن بەدەلدى حالىقارالىق ۇيىمداردىڭ باسشىلارى كەلدى. سەز شەڭبەرىندە پرەزيدەنتتىڭ قاتىسۋىمەن دىني ليدەرلەردىڭ ەكىنشى كەڭەسى وتكىزىلدى. ءوزىنىڭ سوزىندە ق ر پرەزيدەنتى ادامداردى بەيبىتشىلىك پەن كەلىسىمگە، تولەرانتتىلىق پەن كەشىرىمگە ۇندەۋگە ودان ءارى كۇشەيتۋدى سۇرادى. وزدەرىڭىز بىلەسىزدەر، اتالمىش كەڭەسكە الەمدىك جانە ءداستۇرلى دىنگە جاتاتىن 15 ءدىن ۇيىمى مۇشەلىك ەتەدى»، - دەدى ول.

م. ءازىلحانوۆتىڭ اتاپ وتكەنىندەي، سەزد ءدىنارالىق جانە مادەنيەتارالىق سۇحبات الاڭى رەتىندە ۇلكەن سۇرانىسقا يە بولىپ كەلەدى.

ەسكە سالا كەتەيىك، بيىل سەزگە ب ۇ ۇ باس حاتشىسى پان گي مۋن، يوردانيا كورولى II ابداللا، ە ق ى ۇ باس حاتشىسى لامبەرتو زانەر سىندى اسا مارتەبەلى مەيماندار قاتىستى. ەكى كۇنگە سوزىلعان كەلەلى كەڭەس جۇمىسىنا 42 ەلدەن كەلگەن 80 نەن استام دەلەگاتسيا كەلدى. ەلباسىنىڭ باستاماسىمەن قولعا الىنعان الەمدىك جانە ءداستۇرلى ءدىن ليدەرلەرىنىڭ العاشقى سەزى 2003-جىلى وتكەن بولاتىن. سودان بەرى ءار 3 جىلدا ءبىر رەت تۇراقتى تۇردە ۇيىمداستىرىلىپ كەلەدى.

اۆتور: جاسۇلان جولدىبايەۆ