ۇيىردە جوق مال ەسەپكە ەنگىزىلىپ، مەملەكەتتەن جاردەماقى الىنعانى انىقتالدى

استانا. قازاقپارات - اقمولا وبلىسىندا مالشىلار ۇيىردە جوق مالدى ەسەپكە ەنگىزىپ، مەملەكەتتەن سۋبسيديا الىپ وتىرعان.

پروكۋرورلاردىڭ ايتۋىنشا، مۇنداي كەلەڭسىز جايت ءبىر ەمەس، بىرنەشە اۋداندا تىركەلگەن. مىسالى، اتباسار اۋدانىنىڭ اۋىلشارۋاشىلىعى ءونىمىن وندىرۋشىلەرى وسىنداي زاڭسىز جولمەن 9 ميلليون تەڭگەدەن استام قارجىنى قالتاعا سالعان.

اتالعان قاراجات اسىلتۇقىمدى مال شارۋاشىلىعىن دامىتۋ، مالدىڭ ونىمدىلىگى مەن ساپاسىن ارتتىرۋ ماقساتىندا بولىنگەن. زاڭ بويىنشا اقشانى اۋدارماس بۇرىن اۋداننىڭ اۋىل شارۋاشىلىعى ءبولىمىنىڭ ماماندارى قۇجاتتاردا كورسەتىلگەن مال سانىن قوراداعى مالمەن سالىستىرىپ، مۇقيات تەكسەرىپ الۋعا ءتيىس ەدى.

الايدا ولار بۇل مىندەتىنە نەمقۇرايلى قاراپ، مەملەكەت قارجىسىنىڭ قولدى بولۋىنا جول بەرگەن.
بولات بايمەنوۆ، وبلىستىق مامانداندىرىلعان تابيعات قورعاۋ پروكۋرورىنىڭ ورىنباسارى:

- اقمولا وبلىسىنىڭ پروكۋراتۋراسى اسىلتۇقىمدى مال شارۋاشىلىعىن دامىتۋ ءۇشىن سۋبسيديا رەتىندە بولىنگەن بيۋدجەت قاراجاتىن جۇمساۋ زاڭدىلىعىنا تەكسەرىس جۇرگىزدى. سونىڭ ناتيجەسىندە 40 ميلليون تەڭگەدەن استام بيۋدجەت قاراجاتىنىڭ زاڭسىز تولەنگەنى انىقتالدى. تەكسەرىس ناتيجەسى بويىنشا، زاڭ بۇزۋشىلىقتاردى جويۋ تۋرالى 19 ۇسىنىس ەنگىزىلدى. جەرگىلىكتى اتقارۋشى ورگانداردىڭ 42 لاۋازىمدى تۇلعاسى جاۋاپكەرشىلىككە تارتىلدى.

www.24.kz