ءدىندى ءوز ساياسي ماقساتتارىنا يكەمدەپ العان ءتۇرلى توپتار الەمنىڭ ءار جەرىنەن كورىنە باستادى - ەرجان قاجى مايامەروۆ
بۇل تۋرالى بۇگىن الەمدىك جانە ءداستۇرى دىندەر كوشباسشىلارىنىڭ 5- سيەزى اياسىنداعى «بەيبىتشىلىك، قاۋىپسىزدىك جانە ۇيلەسىمدىلىك ءۇشىن الەمدىك جانە ءداستۇرلى ءدىن كوشباسشىلارى اراسىنداعى ءوزارا قۇرمەت پەن تۇسىنىك نەگىزىندەگى سۇحبات» اتتى سەسسيادا قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان قاجى مايامەروۆ ايتتى.
«قادىرلى قاۋىم، ەگەمەن ەلىمىزدىڭ تاتۋلىقتى تۋ ەتكەن تۇڭعىش پرەزيدەنتى نۇرسۇلتان نازاربايەۆ الەمنىڭ ءدىن قايراتكەرلەرىنىڭ باسىن قوسىپ، اسقاق استانامىزدى بەيبىتشىلىك پەن بىرلىكتىڭ سيمۆولىنا اينالدىردى. بۇگىنگى ءداستۇرلى ءدىن كوشباسشىلارىنىڭ كەزەكتى قۇرىلتايى دا وسىناۋ ىزگى ماقساتتارعا ۇندەيدى. ءۇش جىل سايىن وتەتىن ءداستۇرلى قۇرىلتاي ەلىمىزدەگى 70 پايىز مۇسىلماننىڭ باسىن بىرىكتىرەتىن، ەكى جارىم مىڭ مەشىتتى ءبىر ورتالىققا باعىندىرعان قازاقستان مۇسىلماندارى ءدىني باسقارماسىنىڭ جۇمىسىنا دا سەرپىن بەرەتىنى ءسوزسىز»، - دەدى ول.
ەرجان قاجى مايامەروۆتىڭ اتاپ وتۋىنشە، قازىرگى كەزەڭدە الەمدىك قاۋىمداستىق ەكونوميكالىق داعدارىستى، ساياسي ۇلتارالىق، ءدىنارالىق شيەلەنىستەردى باستان كەشۋدە. اسىرەسە، ادامزات جاڭا عاسىردا بۇرىن- سوڭدى بولماعان ءدىني الاۋىزدىقتار، داۋ- جانجالدار، ۇلتارالىق قاقتىعىستارمەن بەتپە- بەت كەلدى.
«ءدىندى ساياسيلاندىرۋ ارقىلى جاستار ساناسىن تەرىس ارناعا بۇرۋ ءۇردىسىنىڭ كۋاگەرى بولدىق. ءدىندى ءوز ساياسي ماقساتتارىنا يكەمدەپ العان ءتۇرلى توپتار الەمنىڭ ءاربىر جەرىنەن كورىنە باستادى. بۇلىكشىلەردىڭ بۇكىل ارەكەتى ءسوز جوق، ءداستۇرلى دىنىمىزگە دەگەن انىق قارسى ارەكەت، ادامشىلىققا دا جات امال. حالقىمىزدا «جۇمىلا كوتەرگەن جۇك جەڭىل» دەگەن ناقىل بار. ورتاق ماقساتقا جەتۋ ءۇشىن ءبارىمىز بىرىگىپ، ءبىر- بىرىمىزگە كومەكشى بولۋىمىز كەرەك»، - دەدى باس ءمۇفتي.
اۆتور: مارلان جيەمباي