ماجىلىسمەن پەن مينيستر اراسىنداعى ايقاس نەمەن اياقتالار ەكەن؟
«ءسارىنجىپوۆ مىرزا ماعان نەمەسە باس پروكۋراتۋراعا كىم، قاشان ماعان اقشا بەرگەنىن ايتسىن. مەن ەشكىمنەن، ارينە، پارا دا العان جوقپىن. جانە مەن كوزقاراسىمدى باسقا بىرەۋدىڭ ىقپالىمەن جاسامايمىن»، - دەدى ءماجىلىس دەپۋتاتى ازات پەرۋاشيەۆ.
باس پروكۋراتۋرا دەپۋتاتتىڭ ارىزىن ىشكى ىستەر مينيسترلىگىنە جىبەرىپتى. قازىر بۇل ءىس بويىنشا تەكسەرۋ ءجۇرىپ جاتىر. ەگەر ءسارىنجىپوۆتىڭ پەرۋاشيەۆتى بەكەر «قارالاعانى» زاڭ جۇزىندە دالەلدەنسە، مينيستر قىلمىستىق جاۋاپقا تارتىلۋى مۇمكىن.
ماجىلىسمەن مەن مينيستر اراسىنداعى داۋ جوعارى وقۋ ورىندارىن اتتەستاتسيالاۋدان بوساتىپ، اككرەديتاتسايادان وتكىزۋ تۋرالى زاڭ جوباسىن تالقىلاۋ كەزىندە تۋعانىن ايتا كەتەيىك. «اق جول» پارتياسىنىڭ ءتوراعاسى ءدال وسى سالانى كەلىستىرە الماي وتىرعان ءبىلىم مينيسترىنە وتستاۆكاعا كەتۋگە كەڭەس بەرگەن بولاتىن. بۇعان شامدانىپ قالعان ءسارىنجىپوۆ دەپۋتاتتى «لوببيست» دەپ سالدى. ءسويتىپ، سوڭىندا ءبىرىن-ءبىرى سوتقا بەرەتىن بولعان.
پروكۋراتۋراعا العاش بولىپ شاعىمدانعان پەرۋاشيەۆ مينيستر جۇرت الدىنا شىعىپ، رەسمي تۇردە كەشىرىم سۇراعاندا عانا ارىزىن قايتارىپ الاتىنىن ايتتى. ال، جەكە كەزدەسىپ شاي ۇستىندە كەلىسىمگە كەلۋگە مۇلدەم قارسىمىن دەيدى ماجىلىسمەن.