استانالىق «ارلاندار» مەن كۋبالىق «قابىلانداردىڭ» قايسىسى جەڭەدى؟
شەشۋشى باسەكەدە «استانا ارلاندارى» مەن «كۋبا قابىلاندارى» كۇش سىناسادى.
قوس كوماندا دا بيىلعى ماۋسىمدى وتە كەرەمەت وتكىزىپ، توپتىق تۋرنيردە جەكە-دارا كوش باستادى. جارتىلاي فينالدا ءوز قارسىلاستارىن ەش كۇمانسىز ۇتقان ولار باس جۇلدە ءۇشىن تالاسۋ قۇقىعىنا يە بولدى.
«استانا ارلاندارىنىڭ» جايى بارشاعا بەلگىلى. قازاقستاندا ىرگەتاسى قالانعان ايتۋلى كوماندا 2013-جىلى WSB دوداسىنىڭ جەڭىمپازى اتانسا، 2011-جىلى كۇمىس مەدالدى يەلەندى. ال 2012 جانە 2014-جىلدارى ءۇشىنشى تۇعىرعا تابان تىرەدى. ەڭ باستىسى، دۇنيەجۇزىلىك بوكس سەرياسى جوباسىندا جەڭىپ العان جۇلدەلەرى جاعىنان ەشبىر كوماندا ءبىزدىڭ جىگىتتەرمەن تەڭەسە المايدى.
بيىلعى ماۋسىمدى «ارلاندار» وتە تاماشا وتكىزدى. قاتارىنان 13 باسەكەدە جەڭىسكە جەتكەن جەرلەستەرىمىز تەك توپتىق تۋرنيردىڭ سوڭعى سايىسىندا عانا يتاليا بوكسشىلارىنان 2:3 ەسەبىمەن ۇتىلدى. ءبىراق بۇل ناتيجەگە، كوڭىلىمىز قۇلازي قويعان جوق. ويتكەنى جەرلەستەرىمىزدىڭ مىقتىلىعى كۇمانسىز ەدى. جانە دە «ارلاندار» العا قويعان جوسپارىن الدىن الا ورىنداپ، پلەي-وفف ماسەلەسىن كۇنى بۇرىن شەشىپ تاستاعان بولاتىن. سول سەبەپتى دە ارقامىزدى كەڭگە سالدىق. ايتقانداي-اق، جارتىلاي فينالدا ءبىزدىڭ جىگىتتەر رەسەي قۇراماسىن تاس-تالقان ەتتى - 9:1.
«كۋبا قابىلاندارى» دا وتە مىقتى كوماندا ەكەنى ەش داۋ تۋعىزباسا كەرەك. بىلتىرعى ماۋسىمدا ايتۋلى جارىستا العاش رەت باق سىناعانىنا قاراماستان، ولار بىردەن باس جۇلدەنى ولجالاپ، كوپشىلىك نازارىن اۋداردى.
بيىل ماۋسىمدا «قابىلاندار» بارلىق باسەكەدە ەش قيىندىقسىز جەڭىسكە جەتىپ، توپتىق سايىستا الدارىنا جان سالمادى. ولار قارسىلاستارىن ءوز جەرىندە دە، سىرتتا دا وڭدىرماي سابادى. جاسىراتىنى جوق، WSB دوداسىنداعى بىردە-ءبىر كوماندا بوستاندىق ارالى وكىلدەرىنە بيىلعى جارىستا جارىتىپ قارسىلىق كورسەتە المادى. ال جارتىلاي فينالدا كۋبالىقتار مەكسيكا بوكسشىلارىن سەڭ سوققانداي ەتتى - 10:0.
جوعارىداعى دەرەكتەرگە قاراپ، «استانا ارلاندارى» مەن «كۋبا قابىلاندارىنىڭ» وزگە كوماندالاردان كوشى الدەقايدا ىلگەرى، الەۋەتى الدەقايدا زور ەكەنىن اڭعارۋعا بولادى. مىنە، ەندى قوس مىقتىنىڭ جولى تۇيىسكەلى وتىر. بۇل ءبىر «جان الىسىپ، جان بەرىسكەن» كەرەمەت باسەكە، ىمىراسىز ايقاس بولاتىنى داۋسىز. سول باسەكە كىمنىڭ پايداسىنا شەشىلەر ەكەن؟ قاي ەلدىڭ ورەندەرى باس جۇلدەنى ولجالايدى؟ مىنە، بۇگىنگى تاڭدا وسى ساۋال بارلىق جانكۇيەرلەردى قاتتى تولعاندىرىپ وتىر.
وسى ورايدا، مىنا ءبىر جايتقا توقتالماي كەتۋگە بولمايدى. جاسىراتىنى جوق، بىزگە قاراعاندا قارسىلاستارىمىز الدەقايدا ازۋلى. بوستاندىق ارالىنان كەلەتىن كوماندانىڭ ساپىندا كىلەڭ ىعاي مەن سىعايلار ونەر كورسەتۋدە. ماسەلەن، 56 كەلى سالماقتا روبەيسي راميرەس كارراسانا بار. 2012-جىلى لوندوندا الاۋى تۇتانعان وليمپيادا ويىندارىندا جەڭىمپاز اتانعان ول ناعىز دۇلەيدىڭ ءوزى.
60 كەلى سالماقتا وليمپيادا ويىندارىنىڭ قولا جۇلدەگەرى، الەمنىڭ ەكى دۇركىن چەمپيونى لازارو الۆارەس كۇش سىناسادى. ونىڭ الەۋەتى قانشالىقتى زور ەكەنىن جانكۇيەرلەر جاقسى بىلەدى.
64 كەلى سالماقتاعى سىنعا تۇسكەلى وتىرعان ياسنيەل تولەدو لوپەس وليمپيادادا قولا مەدالدى موينىنا ىلسە، الەم چەمپيوناتىندا ەكى رەت اقتىق سىنعا دەيىن القىنباي جەتتى.
69 كەلى سالماق دارەجەسىندەگى رونيەل يگلەسياس سوتولونگونىڭ اتاعىنان ات ۇركەدى. ول - لوندون وليمپياداسىنىڭ جەڭىمپازى، بەيجىڭ وليمپياداسىنىڭ قولا جۇلدەگەرى جانە 2009-جىلعى الەم چەمپيونى.
81 كەلى سالماقتا كۋبالىق جانكۇيەرلەر حۋليو سەزار دە لا كرۋزعا سەنىم ارتادى. بۇل قارا تورى جىگىتتىڭ ەكى دۇركىن الەم چەمپيونى دەگەن دارداي اتاعى بار.
ءۇش رەت وليمپيادا ويىندارىندا جانە التى رەت الەم چەمپيوناتىندا قارسىلاس شىداتپاعان فەليكس ساۆوننىڭ تۋعان جيەنى - 91 كەلى كۇش سىناسىپ جۇرگەن ەريسلاندي ساۆون دا قازىر ناعىز بابىندا ەكەنىن جاقسى بىلەمىز.
سونداي-اق يوانيس وسكار پەرەس (49 كەلى)، يوسۆاني ۆەيتيا سوتو (52 كەلى)، ارلەن لوپەس كاردونا (75 كەلى) جانە لەنەر ەنيس پەرو يۋستيس (91+ كەلى) سىندى سايىپقىراندار جايىندا دا كوپ اڭگىمەلەۋگە بولادى. ولاردىڭ الدى الەم بىرىنشىلىگىندە جۇلدەگەرلەر ساناتىنا قوسىلسا، وزگەلەرى پان- امەريكا ويىندارىندا وزا شاۋىپ جۇرگەن ساڭلاقتار.
مىنە، «كۋبا قابىلاندارىنىڭ» قۇرامى وسىنداي ساقا سپورتشىلاردان جاساقتالدى.
ءيا، «استانا ارلاندارىنىڭ» نەگىزگى قۇرامىندا ونەر كورسەتىپ جۇرگەن جىگىتتەردىڭ ەشقايسىسى ونداي دەڭگەيگە جەتكەن جوق. ونى مويىنداۋعا ءتيىسپىز. تىپتەن، ماقتاۋلى دەگەن تەمىرتاس ءجۇسىپوۆ (49 كەلى)، سامات باشەنوۆ (64 كەلى)، مەيىرىم نۇرسۇلتانوۆ (75 كەلى)، حرۆوە سەپ (81 كەلى)، ۆاسيلي ليەۆيت (91 كەلى) جانە فيليپپ حرگوۆيچ (91+ كەلى) سەكىلدى تالاي قۇقايدى كورگەن، تالاي ۇلى دۇرمەكتە ىسىلعان جۋان جۇدىرىقتى جىگىتتەرگە جوعارىدا اتالعان بەلەستەردىڭ بىردە-ءبىرى باعىنعان جوق.
ءبىراق باستى جەكپە-جەك ءوز ەلىمىزدە، ءوز جەرىمىزدە ءوتىپ جاتقاندىقتان ءبىزدىڭ جىگىتتەردىڭ جەڭىلۋگە قاقى جوق. قازاقتىڭ قايسار ۇلدارى مەن حورۆاتيادان كەلگەن قوس لەگيونەر ايقاس الاڭىندا جانىن سالىپ جۇدىرىقتاسۋعا ءتيىس. «قابىلاندار» قانشا جەردەن كۇشتى بولسا دا، «ارلاندار» دا وسال ەمەس. بۇل جولى قالاي دا باس جۇلدەنى قانجىعاعا بايلاۋىمىز كەرەك. بىزگە كۇمىستىڭ قاجەتى جوق.
ءبىزدىڭ ويىمىزشا، وسى جوسپاردى جۇزەگە اسىرۋ ءۇشىن «استانا ارلاندارىنىڭ» قازاقستان ۇلتتىق قۇراما كومانداسىنىڭ ساپىنداعى جىگىتتەرگە ارقا سۇيەگەنى ابزال. قايرات ەراليەۆ (56 كەلى)، دانيار ەلەۋسىنوۆ (69 كەلى)، جانىبەك ءالىمحان ۇلى (75 كەلى) جانە يۆان دىچكو (91+ كەلى) سىندى الەمدىك دودالاردا جۇلدە الىپ جۇرگەن سايىپقىراندار شەشۋشى ايقاسقا شىعاتىن بولسا، وندا اسىعىمىزدىڭ الشىسىنان تۇسەتىنى انىق.
WSB دوداسى ارقىلى وليمپيادا ويىندارىنا جولداما العان بوكسشىلار
49 كەلى - پاتريك بارنەس (يرلانديا، lce Ga & bbanaDo)
52 كەلى - يوسباني ۆەيتيا سوتو (كۋبا، Cuba Domadores)
52 كەلى - اسراف كحارروۋبي (موروككو، Morocco Atlas Lions)
56 كەلى - ۆلاديمير نيكيتين (رەسەي، Russia Boxing Team)
56 كەلى - مايكل دجون كونلان (يرلانديا، olce G & abbanaD)
60 كەلى - لازارو الۆارەس ەسترادا (كۋبا، Cuba Domadores)
60 كەلى - البەرت سەليموۆ ء(ازىربايجان، Azerbaijan Baku Fires)
64 كەلى - ياسنيەر تولەدو لوپەس (كۋبا، Cuba Domadores)
64 كەلى - راۋل كۋريەل گارسيا (مەكسيكا، Mexico Guerreros)
69 كەلى - مۇحاممەد رابيي (ماروككو، Morocco Atlas Lions)
69 كەلى - رادجاب بۋتايەۆ (رەسەي، Russia Boxing Team)
75 كەلى - پەتر حامۋكوۆ (رەسەي، Russia Boxing Team)
75 كەلى - ارلەن لوپەس كاردونا (كۋبا، Cuba Domadores)
75 كەلى - توماش يابلونسكيي (پولشا، Hussars Poland)
81 كەلى - ۆالەنتينو مانفرەدونيا (يتاليا، lce Ga & bbanaDo)
81 كەلى - حۋليو سەزار دە لا كرۋس (كۋبا، Cuba Domadores)
91 كەلى - ۆاسيلي ليەۆيت (قازاقستان، Astana Arlans)
91 كەلى - ەريسلاندي ساۆون (كۋبا، Cuba Domadores)
+91 كەلى - فيليپ حرگوۆيچ (حورۆاتيا، Astana Arlans)
عالىم سۇلەيمەن
«ايقىن»