ۇلتىمىزدىڭ ءبىرتۋار پەرزەنتتەرىنىڭ ۇرپاقتارى مەن تۋعان- تۋىستارى ۇلتتىق مۋزەيگە تۇلعالاردىڭ جادىگەرلەرىن تابىستايدى
شاراعا ءىلياس جانسۇگىروۆ، تاحاۋي احتانوۆ، قانىش ساتبايەۆ، وزبەكالى جانىبەكوۆ، الكەي مارعۇلان، سەركە قوجامقۇلوۆ، ءازىلحان نۇرشايىقوۆ، ەركەعالي راحماديەۆ، عاريفوللا قۇرمانعاليەۆ، كاۋكەن كەنجەتايەۆ ت. ب سىندى ۇلتىمىزدىڭ ءبىرتۋار پەرزەنتتەرىنىڭ ۇرپاقتارى مەن تۋعان- تۋىستارى قاتىسىپ، ولاردىڭ كوزى تىرىسىندە قولدانعان قۇندى جادىگەرلەرىن ۇلتتىق مۋزەيگە تابىستايدى. سونداي- اق، ەلىمىزگە بەلگىلى سۋرەتشى، مۇسىنشىلەر دە ءوز تۋىندىلارىن مۋزەيگە تارتۋ ەتپەك.
اكسيا بيىلعى جىلعى 18 - ناۋرىزدا استانادا قازاقستان رەسپۋبليكاسى ۇلتتىق مۋزەيىندە سالتاناتتى تۇردە باستاۋ العان بولاتىن. شاراعا ق ر پرەمەر- ءمينيسترىنىڭ ورىنباسارى بەردىبەك ساپاربايەۆ، كەنەن ازىربايەۆتىڭ ۇلى باقىتجان ازىربايەۆ، ماسكەۋ وليمپياداسىنىڭ چەمپيونى جاقسىلىق ۇشكەمپىروۆ، بەلگىلى ساياساتتانۋشى ەرلان قارين، «قادىر مىرزاليەۆ» قورىنىڭ ءتوراعاسى دونەدىل قاجىموۆ، وليمپيادا چەمپيوندارى - سەرىك ساپيەۆ، باقىت سارسەكبايەۆ، يۋريي مەلنيچەنكو سىندى ەلگە بەلگىلى ازاماتتار، كوللەكتسيونەرلەر، تانىمال تۇلعالاردىڭ ۇرپاقتارى، سپورتشىلار، جەكە ادامدار قاتىسقان ەدى.
اتالعان شارا تۋرالى قازاقستان رەسپۋبليكاسى ۇلتتىق مۋزەيىنىڭ ديرەكتورى دارحان مىڭباي: «ەل ءىشى - ونەر كەنىشى» . جۇرتتىڭ ساندىعى مەن شكافىندا، شاتىرى مەن جەرتولەسىندە ءالى اشىلماعان، عىلىمي اينالىمعا تۇسپەگەن نەبىر قۇندى جادىگەرلەر تۇر. ونى «بابامنىڭ باباسىنىڭ كوزى» دەپ، ەشكىمگە ايتپاي، كورسەتپەي ۇستاۋ ارقىلى ساقتايمىز دەپ ويلايدى.
ال شىندىعىندا، بەتىن اۋلاق قىلسىن، ونىڭ وتتان- سۋدان ساقتاندىرىلماعانى بىلاي تۇرسىن، كەز- كەلگەن زات بيولوگيالىق وزگەرىستەردىڭ سالدارىنان جىلدان- جىلعا جويىلا بەرەدى. جادىگەردىڭ ءبۇتىن قالپىن تەك بىرنەشە ۇرپاعى عانا كورۋى مۇمكىن. كادىمگىدەي جىلمەن ەسەپتەگەندە، 50-70 جىلدا جەكە ازاماتتىڭ قولىنداعى بۇيىم، زات جويىلىپ وتىرادى. اركىم ءوز وتباسىنداعى قادىرلى بۇيىم تۋرالى ويلانىپ كورسىنشى، سونىڭ كوبى جوعالعان، جويىلعان نەمەسە قولدى بولعان. سوندىقتان «كەز- كەلگەن مۇرا مۋزەيدە ساقتالىنۋ كەرەك» دەگەن ەلدىك ۇستانىمدى جالپى حالىقتىق پارىز ساناۋدىڭ ۋاقىتى تۋدى دەپ سانايمىن. مۋزەيگە لايىقتى بۇيىمدى، زاتتى، قۇجاتتى ەكسپونات رەتىندە قورعا تاپسىرۋدىڭ ءوزى قازاقستاننىڭ كەز- كەلگەن ازاماتى ءۇشىن ابىروي، دارەجە بولاتىن كۇن دە الىس ەمەس. بۇل الەمدە بار ءۇردىس» دەيدى.
شارا ماقساتى - ۇلتتىق تاريحي- مادەني مۇرامىزدى ساقتاۋ ماسەلەسىنە قوعام نازارىن اۋدارۋ. ەل اراسىندا ەلەۋسىز جاتقان تاريحي ماڭىزى زور قۇندى زاتتاردى، ۇلتىمىزدىڭ ءىرى تۇلعالارىنىڭ جادىگەرلەرىن كاسىبي تۇرعىدا ساقتاۋعا جانە كوپشىلىك نازارىنا ۇسىنۋ ءۇشىن ۇلتتىق مۋزەيگە تاپسىرۋعا ۇندەۋ.
شارتى: «ۇلتتىق مۋزەيگە سىي تارتۋ» اكتسياسىنا قاتىسۋشى ءوزىنىڭ كوللەكسياسىنداعى قۇندى جادىگەردى، ەل تاريحىنا قاتىستى ەلەۋلى مۇرانى نەمەسە ەلگە بەلگىلى تۇلعانىڭ قولدانعان زاتتارىن مۋزەيگە ساقتاۋعا تابىستايدى. بارلىق سىي- تارتۋلارعا (جادىگەرلەرگە) زاڭدىق نەگىزدە قابىلداپ الۋ شارتى جاسالىپ، ولار مۋزەيدىڭ قورىنا وتكىزىلەتىن بولادى. سىي- تارتۋلار نەگىزىندە ۇلتتىق مۋزەيدە ارنايى كورمە ۇيىمداستىرىلادى.
اكسيا جىل سوڭىنا دەيىن جالعاسىپ، ەلىمىزدىڭ بارلىق ايماعىن قامتيتىن بولادى.