ق ر سىرتقى ىستەر مينيسترلىگى قاجىلىققا باراتىن قازاقستان ازاماتتارىن بارىنشا اباي بولۋعا شاقىرۋدا

استانا. قازاقپارات - ق ر سىرتقى ىستەر مينيسترلىگى وڭتۇستىك كورەيادا جۇرگەن جانە قاجىلىققا باراتىن قازاقستان ازاماتتارىن بارىنشا اباي بولۋعا شاقىرادى.

 بۇل تۋرالى بۇگىن اتالعان ۆەدومستۆونىڭ رەسمي وكىلى التاي ابيبۋللايەۆ ايتتى.

 «تاياۋ شىعىستىق رەسپيراتورلىق سيندرومىنا بايلانىستى وڭتۇستىك كورەياداعى احۋال وتە قيىن بولىپ وتىر. قازىرگى ۋاقىتتا 2802 ادام كارانتيندە، 8 نەمەسە 7 ادام قازا تاپتى. 2208 مەكتەپ جابىلدى، 95 ادام اتالعان ۆيرۋستى جۇقتىرعان. بۇگىنگى كۇنى سەۋلدەگى ەلشىلىگىمىزدىڭ مالىمەتتەرىنە سايكەس ءبىزدىڭ ەلدىڭ شامامەن 500 ازاماتى تىركەلگەن. بۇعان قوسا، وڭتۇستىك كورەيادا ۋاقىتشا 3 مىڭنان استام ازاماتىمىز ءجۇر. مەن قازاقستان مەن وڭتۇستىك كورەيا اراسىندا ۆيزاسىز رەجىم ورناتىلعاندىعىن اتاپ وتكىم كەلەدى. سونىمەن بىرگە قازاقستان مەن وڭتۇستىك كورەيا اراسىندا تۇراقتى اۋە بايلانىسى جولعا قويىلعان»، - دەدى ول.

وسى رەتتە س ءى م رەسمي وكىلى وڭتۇستىك كورەيادا جۇرگەن بارلىق قازاقستان ازاماتتارىن اباي بولۋعا شاقىردى. ول ۆيرۋسقا شالدىعۋ دەرەگى 2012 - جىلى تىركەلگەندىگىن، ونىڭ تاياۋ شىعىس ەلدەرىنەن ورالعان كورەيلىك بولعاندىعىن ەسكە سالدى.

سونىمەن قاتار ا. ابيبۋللايەۆ 18 - ماۋسىمىنان رامازان ايى باستالاتىندىعىن، ول اياقتالعاننان كەيىن كوپتەگەن قازاقستاندىقتار ساۋد ارابياسىنا قاجىلىققا اتاناتىندىعىن اتاپ ءوتتى. بۇل ەلدە تاياۋ شىعىستىق رەسپيراتورلىق سيندرومىنا شالدىعىپ، 95 ادام مەرت بولعان. سوندىقتان اتالعان ەلگە بارعاندا بارىنشا اباي بولعان ءجون.

رەسمي وكىل مۇنان بولەك، قازاقستانعا ۆيرۋستىڭ تارالۋىنا جول بەرمەۋ ماقساتىندا حالىقارالىق اۋەجايلار سايكەسىنشە جۇمىس رەجىمىنە كوشىرەتىندىگىن باسا ايتتى.

اۆتور: مارلان جيەمباي