ورال قالاسىندا مەكەمە ديرەكتورىنىڭ ورىنباسارى جالعان ديپلوممەن جۇمىس جاساعان
12:35, 09 - ماۋسىم 2015
ورال. قازاقپارات - «سۋ سپورتى تۇرلەرى بويىنشا بالالار- جاسوسپىرىمدەر سپورت مەكتەبى» م ك ق ك- نى تەكسەرگەن كەزدە مەكەمە ديرەكتورى وقۋ ءىسى جونىندەگى ورىنباسارىنىڭ قازاق سپورت جانە تۋريزم اكادەمياسىن بىتىرگەندىگى تۋرالى جالعان قۇجاتپەن جۇمىس جاساعانى بەلگىلى بولدى.
ورال قالاسى پروكۋراتۋراسىنان تۇسكەن مالىمەتكە قاراعاندا، اتالعان فاكتى بويىنشا ق ر ق ك 385-بابى 3-بولىگىنە سايكەس قىلمىستىق ءىس قوزعالىپ، قازىر ول قالالىق ىشكى ىستەر باسقارماسىندا قارالۋ ۇستىندە.
سونىمەن قاتار سانيتارلىق تالاپ-ەرەجەلەردىڭ بۇزىلعانى انىقتالدى. اتاپ ايتقاندا، ءجۇزۋ جولدارى وقۋ- جاتتىعۋ كەزىندە جالعا بەرىلگەن، ءسويتىپ ول جاسوسپىرىمدەردىڭ وقۋ ۇدەرىسىنە كەدەرگى كەلتىرگەن.
مۇندا وقىمايتىن، سونداي-اق ءتيىستى مەديتسينالىق قاراۋسىز جانە انىقتاماسىز ادامداردىڭ كەلۋى، جاتتىعۋدىڭ دارىگەرسىز جۇرگىزىلۋى ورىن العان. ەڭبەك جانە سالىق زاڭدىلىعىن بۇزۋشىلىق تا تىركەلگەن.
اتالعان زاڭبۇزۋشىلىقتاردى جويۋ جونىندە ب ق و دەنە شىنىقتىرۋ جانە سپورت باسقارماسىنا ۇيعارىم بەرىلدى.
اۆتور: ەلجان ەرالى