قاماۋعا الىنعان اقتوبەلىك دەپۋتاتتىڭ ۇيىندە ميلليارد تەڭگەگە جۋىق اقشا تابىلدى
اقتوبە قالاسىنىڭ 2№ سوتىنىڭ قاۋلىسىنا سايكەس، دەپۋتاتتىڭ ءۇيى مەن جۇمىس ورنىندا «1800000 ا ق ش دوللارى، 2970000 تەڭگە، 299500 ەۋرو، 1645000 ا ق ش دوللارى، 1323000 ەۋرو، 3850000 تەڭگە، 326300 رۋبل، 220 ب ا ءا ديرحەمى، 8 گريۆەن كولەمىندە قاراجات تابىلدى».
دەپۋتاتتىڭ وسى قاراجاتىنا، سونىمەن قاتار جىلجىمايتىن مۇلكىنە (اقتوبەدەگى پاتەرى، جەر ۋچاسكەسى جانە شالقار قالاسىنداعى قوعامدىق-ىسكەرلىك مەكەمەسى) سوت تاركىلەۋ تۋرالى شەشىم شىعاردى.
ەسكە سالايىق، مەيىرجان وندىرگەنوۆ 30- مامىردا اسا ءىرى كولەمدە قارجى بوپسالادى جانە ولتىرەمىن دەپ قورقىتتى دەگەن كۇدىكپەن ۇستالعان بولاتىن. دەپۋتات ەكى ايعا قاماۋعا الىندى. دەپۋتاتقا تاعىلىپ وتىرعان ايىپتاۋ باپتارى 7 جىلدان 15 جىلعا دەيىن مۇلكىن تاركىلەۋ ارقىلى باس بوستاندىعىنان ايىرۋدى جانە 200 ا ە ك كولەمىندە ايىپپۇل سالۋدى قاراستىرادى.
وسىعان دەيىن كاسىپكەردىڭ بۇرىنعى سەرىكتەسى باۋىرجان ءپىرمانوۆ تىلشىلەرگە وندىرگەنوۆتىڭ قارجى ماحيناتسياسى جايلى ايتىپ بەرگەن بولاتىن. «قۇرىلتايشى وندىرگەنوۆپەن كەلىسپەۋشىلىكتەر كوپ بولدى، مەن 2012-جىلى جۇمىستان كەتۋگە ءماجبۇر بولدىم. كەلىسپەۋشىلىكتەر سالىق سالۋ ىسىنە كەلگەندە باستالدى. ونىڭ ۇلكەن جاقتاۋشىلارى بولدى، ءبىراق قازىر ونىڭ باسى داۋعا قالدى. ول مەنىڭ ارىزىم ارقىلى بوپسالاۋ بويىنشا قاماۋعا الىندى. 2012-جىلى مەن ءبارىن ونىڭ اتىنا جازىپ بەردىم. ول ءوز اتىنا جازدىرۋعا ءماجبۇر ەتتى، كولىكتى الىپ قويدى. ول ءبارىن ساتىپ الا الاتىنىن ايتتى. بۇرىن «اۆتوپارك» ج ش س- نىڭ كۇن سايىنعى تابىسى 5,6 ميلليون تەڭگە بولعان، جول ءجۇرۋ قۇنى قىمباتتاعاننان كەيىن شامامەن 8 ميلليونعا ءوستى. سونىمەن قاتار، جىل سايىن اۆتوپارك بيۋدجەتتەن 800 ميلليون تەڭگە الىپ تۇرادى. سالىق ەسەبىندە ول تاقىرعا وتىرعانىن مالىمدەيدى، ال بۇل تابىسى قىرۋار ج ش س. ول ەكى جاقتى بۋحگالتەريا ۇستادى، قاراجاتتى كومپانياعا اۋداردى. ءتىنتۋ جۇرگىزىلگەندە ونىڭ قىرۋار قارجىسى تاركىلەندى. ونى ادامدار ماشينكامەن 5 ساعات سانادى»، - دەدى ءپىرمانوۆ.