ءدىني جانە ساياسي ليدەرلەرگە حالىقتاردىڭ بەيبىت ءومىر ءسۇرۋى مەن قاۋىپسىزدىگى جولىندا ەرەكشە جاۋاپكەرشىلىك ارتىلادى - ق. توقايەۆ
«بۇگىن ءبىز الەمدىك جانە ءداستۇرلى دىندەر ليدەرلەرىنىڭ بەسىنشى سەزىنە دايىندىق جۇمىستارىن قورىتىندىلاۋ ءۇشىن جينالىپ وتىرمىز. وسى مۇمكىندىكتى پايدالانا وتىرىپ، الەمدىك جانە ءداستۇرلى دىندەر ليدەرلەرىنىڭ سەزىنىڭ قىزمەتىنە كورسەتىپ كەلە جاتقان جان- جاقتى قولداۋلارىڭىز بەن ەرەكشە ىقىلاستارىڭىز ءۇشىن سىزدەرگە شىنايى العىسىمدى بىلدىرەمىن»، - دەدى ول.
سەنات سيپكەر ءوز سوزىندە ەرتەڭ بەسىنشى سەزدە ءدىن ليدەرلەرى الەمنىڭ ءبىرقاتار مەملەكەت باسشىلارىمەن، بەدەلدى حالىقارالىق ۇيىم جەتەكشىلەرىمەن، كورنەكتى ساياسات جانە قوعام قايراتكەرلەرىمەن، عىلىمي قوعامداستىق جانە ازاماتتىق سەكتور وكىلدەرىمەن بىرلەسە وتىرىپ، ورتاق ديالوگ الاڭىندا پىكىر الماساتىندىعىن اتاپ ءوتتى.
«الەمدىك دامۋدا بولىپ جاتقان سان الۋان ۇدەرىستەر قازىرگى زامانعى وركەنيەتتىڭ ىرگەلى سەرپىلىستەرگە اياق باسقانىن كورسەتىپ وتىر. بۇل الەم سيپاتى مەن الەمدىك ەكونوميكالىق جۇيەنى قايتا قۇرۋدى، قوعامداردى الەۋمەتتىك تۇرعىدا ۇيىمداستىرۋدى جانە ولاردىڭ يدەولوگيالىق نەگىزدەرىن تەرەڭىنەن وزگەرتۋدى تالاپ ەتەدى. وسى تۇرعىدا ءدىني جانە ساياسي ليدەرلەرگە حالىقتاردىڭ بەيبىت ءومىر ءسۇرۋى مەن قاۋىپسىزدىگى جولىندا ەرەكشە جاۋاپكەرشىلىك ارتىلادى. ولار بىرلەسە ارەكەت ەتە وتىرىپ، مەملەكەتتەر مەن حالىقتاردىڭ قاۋىپسىزدىگىن، تۇراقتىلىعىن جانە ىنتىماقتاستىعىن دامىتۋعا ىقپال ەتىپ، بەيبىتشىلىك پەن كەلىسىم ءۇنىن ەسەلەي تۇسەتىنى داۋسىز. الداعى ءدىنارالىق سامميت الەم ءۇشىن اسا قاجەتتى، ىزگى نيەتتى جۇزەگە اسىرۋ ىسىنە جاڭاشا سەرپىن بەرەدى دەپ سەنەمىز»، - دەدى ق. توقايەۆ.
ايتا كەتەيىك، وتىرىس بارىسىندا الەمدىك جانە ءداستۇرلى دىندەر كوشباسشىلارى 5- سەزىنىڭ كۇن ءتارتىبى بەلگىلەنىپ، سەزد قاتىسۋشىلارى دەكلاراتسياسىنىڭ جوباسى ماقۇلدانىلادى دەپ كۇتىلۋدە. سونىمەن قاتار الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ 15- جانە سەزدىڭ 6- وتىرىستارىن وتكىزۋ مەرزىمى انىقتالاتىن بولادى. مۇنان بولەك، جيىن سوڭىندا حاتشىلىقتىڭ حاتتاماسىن قابىلداۋ جوسپارلانۋدا.
اۆتور: مارلان جيەمباي