سونىمەن قاتار ول وبلىستىڭ شتاتتان تىس باس وتولارينگولوگى قىزمەتىنەن بوساتىلدى.
ب ق و دەنساۋلىق ساقتاۋ باسقارماسى باسشىسىنىڭ ورىنباسارى نۇرجامال جۇماعۇلوۆانىڭ ءمالىم ەتكەنىندەي، بۇل وقيعا بويىنشا ارنايى كوميسسيا جۇمىس جاساۋدا.
بيىلعى مامىردا ورال قالاسىنداعى №5 -ەمحانادا دارىگەرلەر دانيەلدەن ادەنويدىنى انىقتايدى. ءبىر اپتادان كەيىن زەلەنوۆ اۋداندىق ورتالىق اۋرۋحاناسىندا وبلىستىڭ شتاتتان تىس باس وتولارينگولوگى، ءبىرىنشى ساناتتى دارىگەر راسۋل كامكيەۆ بالاعا وتا جاسايدى. ونىڭ 14 جىلدان استام جۇمىس ءوتىلى بار، سامارا، الماتى، گەرمانيا ۋنيۆەرسيتەتتەرىندە بىلىكتىلىگىن جەتىلدىرگەن. وتادان كەيىن دانيەلدىڭ مۇرنىنان قان كەتىپ، قۇسۋ باستالادى. بالا ءبىر كۇننەن كەيىن جانساقتاۋ بولىمىندە كوز جۇمدى.
تەكسەرۋ كوميسسياسى سونىمەن قاتار ورال قالالىق №5 -ەمحانا مەن زەلەنوۆ اۋداندىق اۋرۋحاناسىنىڭ قاتەلىكتەرىن انىقتادى. قالالىق №5 -ەمحانا ءسابيدىڭ دەنساۋلىعىنا تولىق ەمەس ديناميكالىق قاداعالاۋ جاساعان. زەلەنوۆ اۋداندىق اۋرۋحاناسىندا وتادان كەيىنگى قان توقتاماۋعا دەر كەزىندە دياگنوز قويىلماعان. قۇقىق قورعاۋ ورگاندارى ق ر ق ك 317-بابى (مەديتسينا نەمەسە فارماتسيەۆتيكالىق قىزمەتكەردىڭ كاسىبي مىندەتتەرىن تيىسىنشە ورىنداماۋى) جانە 318-بابى (كلينيكالىق زەرتتەۋلەر جۇرگىزۋدىڭ، ەمدەۋدىڭ جانە مەديتسينالىق وڭالتۋدىڭ ءتارتىبىن بۇزۋ) بويىنشا سوتقا دەيىنگى تەكسەرىس جۇرگىزۋدە. تۇپكىلىكتى شەشىم پاتولوگوانوتوميالىق جانە گيستولوگيالىق تولىق زەرتتەۋلەردەن كەيىن قابىلداناتىن بولادى.
ازىرگە زەلەنوۆ اۋداندىق اۋرۋحاناسى ديرەكتورىنىڭ ورىنباسارى گۇلنار ماۋلەتوۆا قىزمەتىنەن بوساتىلدى. ال اتالمىش اۋرۋحانا ديرەكتورى ناديا احمەتوۆا مەن №5 -قالالىق ەمحانا باسشىسىنا، د. كاپەللينيگە مەديتسينالىق كومەك كورسەتۋدە قاتەلىك جىبەرگەن باسقا دا قىزمەتكەرلەرگە تارتىپتىك شارا قولدانىلدى.
قازىرگى كەزدە ق ر دەنساۋلىق ساقتاۋ جانە الەۋمەتتىك دامۋ مينيسترلىگى مەديتسينالىق جانە فارماتسيەۆتيكالىق باقىلاۋ كوميتەتى دە تەكسەرىس جۇرگىزۋدە. ولاردىڭ قىزمەتتىك تەكسەرىس ماتەريالدارى دا تەرگەۋ ورگاندارىنا بەرىلەدى.
اۆتور: ەلجان ەرالى