حالىقارالىق كونسەرتتە قازاقستاندىق ورەندەر ورگە ءجۇزدى
165 ەلدىڭ ونەرلى ورەندەرى باس قوسقان شاراعا جەرلەستەرىمىز دە قاتىسىپ، الاشتىڭ ابىرويىن اسىرىپ قايتتى. ەۋروپانىڭ بىرنەشە قالاسىندا وتكەن بايراقتى باسەكەدە قازاقتىڭ تالابى تاۋداي تالانتتى ۇل-قىزدارى توپ جارىپ، ۇزدىكتەر قاتارىنان كورىندى.
رۋمىنيادا ۆوكالدىق اندەر سايىسىندا جەرلەستەرىمىز باس جۇلدەنى جەڭىپ السا، ءبي جارىسىندا II ورىنعا يە بولدى. جارىس اياسىندا جاس دارىندار بەلگيا جانە ەۋروپا پارلامەنتىنىڭ باسشىلارىمەن ارنايى كەزدەسىپ، كۇللى الەم حالقىن بەيبىتشىلىككە ۇندەگەن كەلەلى كەڭەسكە قاتىستى. قىزىلوردالىق قۇرالاي مەيرامبەك XII حالىقارالىق تىلدەر مەن مادەنيەت فەستيۆالىندە تۇرىك تىلىندەگى ءان سايىسىندا قازاق ەلىنىڭ نامىسىن قورعادى.
12 جاستاعى جەرلەسىمىز رۋمىنيا تورىندە ماحاببات جايىندا ءان شىرقاپ، باس جۇلدەنى قانجىعاعا بايلادى.
قۇرالاي مەيرامبەك، ءانشى:
- بەلارۋستە وتكەن سلاۆيان بازارى بايقاۋىنان I ورىن الدىم. يسپانيادا دا I ورىن يەگەرى بولدىم. يتالياداعى San Remo بايقاۋىنان I ورىن الىپ كەلدىم. قازاقستاننىڭ بايراعىن كوتەرۋ ءۇشىن، اتىن شىعارۋ ءۇشىن وسى جاققا ءبىز كەلدىك.
البينا فرولوۆا، ءبيشى:
- ءاردايىم قازاقستان تۋرالى سۇراعاندا، ءبىز ەڭ الدىمەن تۋعان جەرىمىز بەن ەگەمەن ەلىمىزدىڭ ەرەكشە ادەمى، ءارى قۇتتى مەكەن ەكەنىن ايتامىز. دوستىقتى تۋ ەتكەن حالقىمىزدىڭ قوناقجاي پەيىلىن ماقتان تۇتامىز. وسىنداي ونەر سايىسىندا سان الۋان ۇلت وكىلدەرىنىڭ باس قوسىپ، تىعىز مادەني بايلانىس ورناتۋى شاراپاتى مول، قۇپتارلىق شارا. فەستيۆال بارىسىندا تالابى تاۋداي تالانتتى ورەندەر ەۋروپا پارلامەنتى جەتەكشىلەرىمەن جانە دەپۋتاتتارمەن كەزدەسىپ، الەمدەگى بەيبىتشىلىك تۇرعىسىندا وي ءبولىستى.
حەرمان ۆان رومپەي، ەۋروپا كەڭەسىنىڭ بۇرىنعى ءتوراعاسى:
- حالىقارالىق تىلدەر مەن مادەنيەت فەستيۆالى بريۋسسەلدە ءوتىپ جاتقانىنا وتە قۋانىشتىمىن. شۇكىر، مىنە، 70 جىلدان استى، ەۋروپا سوعىس اتاۋلىدان ادا-كۇدە امان. بارشا ادام بالاسىنا بەيبىتشىلىك قاجەت. ءار ۇلتتىڭ وزىنە ءتان ەرەكشەلىكتەرى بولعانىمەن، وزگەنى دە قۇرمەتتەي ءبىلۋى ءتيىس.
مۇسا ەرەن، قازاقستاندىق فەستيۆال قاتىسۋشىلارى توبىنىڭ جەتەكشىسى:
- ءبىرىنشى ارمانىمىز - قازاقستانىمىزدى باسقا مەملەكەتتەرگە تانىتۋ، بۇل ءبىز ءۇشىن ماڭىزدى. EXPO-2017 الدىندا ءبىزدىڭ قازاقستان ءۇشىن قۋانىش دەپ ويلايمىز. حالىقارالىق فەستيۆالدىڭ قورىتىندى كونتسەرتىن بەلگياداعى بىرنەشە مەملەكەتتىك تەلەارنا تىكەلەي ەفيردە كورسەتتى. وسىلايشا قازاقتىڭ جاس دارىندارىنىڭ ونەرىن بارشا ەۋروپا حالقى تاماشالاپ، تالانتىنا تامساندى. الەل مەرەيىن وسىرگەن ورەندەرىمىز كەلەسى جىلى بىرەگەي شارانى ءوز ەلىمىزدە وتكىزۋگە نيەت ءبىلدىردى.
www.24.kz