ەلىمىزدىڭ اتىن الەمگە تانىتاتىن جاڭا ەسىمدەردىڭ شىعىپ جاتقانى كوڭىل قۋانتادى - «كلاسسيك» راديوسىنىڭ ديرەكتورى

استانا. قازاقپارات - عالىمدار كلاسسيكالىق اۋەندى تىڭداۋ ادامنىڭ كوڭىل-كۇيىنە جاعىمدى اسەر ەتىپ قانا قويماي، عاسىرلار بويى ۋاقىت ەلەگىنەن وتكەن سازدىڭ ادامنىڭ جان-دۇنيەسىنە ۇيلەسىمدىك پەن سۇلۋلىق سىيلايتىنىن ايتادى.

بۇل تۇرعىدا ادامدى اسەمدىك الەمىنە تارتىپ، جانىن بيازى باۋراپ الاتىن سيقىرلى سازدى ءسۇيىپ تىڭدايتىن تىڭدارماندار ءۇشىن «Classic» راديوسىنىڭ ءجونى بولەك.

بۇگىن، 6 ماۋسىم كۇنى قازاقستانداعى تۇڭعىش كلاسسيكالىق مۋزىكا راديوسىنىڭ قۇرىلعانىنا 4 -جىل تولدى.

ايتا كەتەيىك، «Classic» راديوسىنىڭ «كلاسسيكومانيا» باعدارلاماسى 2013 -جىلى لوندوندا حالىقارالىق تەلەراديوتاراتۋشىلار قاۋىمداستىعى

ۇيىمداستىرعان «AIBs Inspiring Creativity Awards» بايقاۋىندا «ەڭ بىرەگەي، ويىن- ساۋىق جانە دامىتاتىن باعدارلاما» دەپ تانىلىپ، ارنايى ديپلوممەن ماراپاتتالدى، ءدال وسى جىلى Fashion TV Awards سالتاناتىندا «Classic» راديوسىنا «ساننەن شىقپايتىنى ءۇشىن» جۇلدەسىن، جىل سايىنعى «جىل تاڭداۋى - جىل ادامى» فەستيۆالى شەڭبەرىندەگى «التىن ادام» سىيلىعى تابىستالدى.

وسى ايتۋلى مەرەكەمەن قۇتتىقتاۋ ءارى ەلىمىزدەگى كلاسسيكالىق اۋەندەرگە ارنالعان تۇڭعىش راديونىڭ بۇگىنگى كۇنگى مادەنيەتىمىزدىڭ دامۋىندا الار ورنى مەن بولاشاق جوسپارلارى تۋرالى ءبىلۋ ماقساتىندا ءبىز «Classic» راديوسىنىڭ ديرەكتورى راۋشان جۇمانيازوۆانى اڭگىمەگە تارتقان ەدىك.

- الدىمەن، «Classic» راديوسىنىڭ بۇگىنگى تۋعان كۇنى قۇتتى بولسىن! بۇل ءتورت جىل ۋاقىت «Classic» ءتارىزدى ەلىمىزدەگى باسقا راديولاردان ەرەكشە راديو ءۇشىن نە بەردى؟

- ۇلكەن راحمەت! ماعان دا «Classic» راديوسىن تۋعان كۇنىمەن قۇتتىقتاۋعا رۇقسات ەتىڭىزدەر، سەبەبى، مەن بۇل مەرەكەنى بارلىق قازاقستاندىقتار ءۇشىن ورتاق مەرەكە دەپ سانايمىن. ءبىزدىڭ ءۇش جاسىمىزعا تاعى ءبىر جاس قوسقانىمىزعا كەلەر بولساق، ءار ادامنىڭ بالالىق شاعىنداعى وسى بال شاعى ءتارىزدى، بۇل ءبىز ءۇشىن بەلسەندى ءوسۋ كەزەڭى. اۋديتوريامىزدىڭ سانى كۇننەن-كۇنگە ارتىپ كەلەدى. ونىمەن بىرگە راديو ۇجىمىنىڭ كاسىبي شەبەرلىگى دە ارتۋدا. الداعى كۇندەرگە جوسپارلارىمىز دا، ۇمىتتەرىمىز دە كوپ. ال ءدال مەن ءۇشىن راديونىڭ ءتورت جاسقا تولۋى - بۇل باقىتقا، تولعانىستار مەن ءتاتتى ىزدەنىستەرگە تولى 1460 كۇن!

 - «Classic» راديوسىن كىمدەر كوبىرەك تىڭدايدى: جاستار ما، الدە ورتا جاستاعىلار مەن قاريالار ما؟ ولاردىڭ كلاسسيكالىق اۋەنگە دەگەن كوزقاراستارى قانداي؟ ءتىپتى، ولاردىڭ 4 جىل ىشىندە كوڭىلدەرىنەن اسا شىققان، ەفيردەن بەرۋدى ءجيى سۇرايتىن سۇيىكتى باعدارلامالارى، كلاسسيكالىق مۋزىكاداعى سۇيىكتى جانرلارى دا ايقىندالعان دا بولار؟

- بۇل بىزگە اسا ءجيى قويىلاتىن سۇراقتاردىڭ ءبىرى. بىلەسىز بە، كلاسسيكالىق مۋزىكاعا ماحاببات ءتارىزدى، بارلىق جاستا باعىنادى. سوندىقتان بىزدە ءتىپتى ەڭ كىشكەنتاي بۇلدىرشىندەرگە ارنالعان باعدارلامالارىمىز بار، مۇمكىن، بالالار ءۇشىن ءبىزدىڭ راديومىزدىڭ الار ورنى ماڭىزدىراق بولار. دەگەنمەن، ءبىزدىڭ تىڭداۋشىلارىمىز - تۇلعا رەتىندە قالىپتاسىپ، ءوز- وزىنە، ءوزىنىڭ قالاۋلارى مەن تالاپ-تىلەكتەرىنە دەگەن سەنىمى زور، ءارى ۇنەمى ءوسىپ- جەتىلىپ وتىرۋعا بەيىم جاندار.

 كوبىنە- كوپ ءبىزدىڭ راديومىزدى «كۇيزەلىسكە قارسى راديو»، «شابىت تۋدىراتىن راديو» دەپ اتاپ جاتادى. مەن مۇنى ءبىزدىڭ ەفيردەگى ەڭبەگىمىزگە بەرىلگەن ەڭ ۇلكەن باعا دەپ بىلەمىن. ءار باعدارلامامىزدىڭ ءوز تىڭداۋشىلارى بار، كوپ ادامدار ءتىپتى ءجانيا اۋباكىروۆامەن نەمەسە نۇرگۇل ەرتايەۆامەن بولاتىن باعدارلامانى وتكىزىپ الماۋ ءۇشىن گادجەتتەرىندە سول حاباردىڭ ەفيردەن بەرىلەتىن ۋاقىتىن ەسكە سالاتىن قىزمەتتى ىسكە قوسىپ قويادى. قازاقتىڭ ءداستۇرلى اۋەندەرى تۋرالى سىر شەرتەتىن «تىلسىم پەرنە» باعدارلاماسى اسا جوعارى باعالانادى. ونىڭ اۆتورى زيرا ناۋرىزبايەۆا اعىمداعى جىلى ايگىلى «التىن ادام» سىيلىعىن يەلەندى. سونىمەن قاتار ولەگ بورەتسكييدىڭ جانە ليليا كالاۋستىڭ باعدارلامالارىن ءسۇيىپ تىڭداۋشىلار سانى وتە كوپ. ال بال بوبەكتەرىمىز بولسا، ەرتەگىنىڭ سيقىرلى الەمىنە جەتەلەيتىن ريتا كيسەليەۆانىڭ «اۋەندى وديسسەياسىن» قۇر جىبەرمەۋگە تىرىسادى.

- قازىرگى تاڭدا قازاقستاندا كلاسسيكالىق مۋزىكانىڭ دامۋ باعىتى، نەگىزگى باعدارلارى قانداي؟ بۇگىنگى جاھاندانۋ جاعدايلارىنىڭ وعان وزىندىك اسەرى بار ما؟

- ءبىزدىڭ ەلىمىزدە كلاسسيكالىق مۋزىكانىڭ ءوزىنىڭ تىڭداۋشىلارى، ءوز داستۇرلەرى، ءوز جەڭىستەرى مەن باسىمدىقتارى بار. قازاقستاننىڭ مادەني ومىرىنە اسا زور ىقپالىن تيگىزگەن سوڭعى جىلدارداعى ايتۋلى وقيعالاردىڭ ءبىرى ەلوردادا «استانا وپەرا» تەاترىنىڭ اشىلۋى بولدى. ماسەلەن، ءسال بۇرىنىراق جىلدارى ۆاگنەردىڭ وپەرالارىن قويۋ تۋرالى ءتىپتى قيالداي دا المايتىنبىز، ال قازىرگى ونەرسۇيەر قاۋىم پرەمەرالار مەن قويىلىمداردى ءوز كوزدەرىمەن تاماشالاپ، جاندى كورىنىستەردەن ءلاززات الۋ باقىتىنا يە...

ءبىزدىڭ داۋىرىمىزدەگى كلاسسيكالىق مۋزىكا - بۇل شەكسىزدىك الەمى، سوندىقتان بىرلەسكەن حالىقارالىق جوبالاردى كوپتەپ جۇزەگە اسىرۋدامىز. اتاپ ايتقاندا، وپەرا جانە بالەت ترۋپپالارىنىڭ، سيمفونيالىق وركەسترلەردىڭ حالىقارالىق قۇرامىنىڭ بولۋى، الەمدىك دەڭگەيدەگى سوليستەر مەن كاسىبي ونەر يەلەرىنىڭ ءبىزدىڭ ەلىمىزگە شاقىرىلۋى ءتارىزدى مۋزىكا الەمىندەگى ىقپالداستىقتار دا ارتىپ كەلەدى.

ال ەڭ ماڭىزدىسى، مۇنداي ىنتىماقتاستىقتىڭ قارسى تاراپتاردىڭ دا زور قىزىعۋشىلىعىن تۋدىرۋىندا. سوندىقتان دا امەريكاندىق نەمەسە ميۋنحەندىك راديودا قازاق مۋزىكاسى تۋرالى حابارلار زور ىقىلاسپەن دايىندالادى، ال دەنيس ماتسۋيەۆ مىنە، بىرنەشە جىلدان بەرى ەلوردالىق جاس پيانيستەر بايقاۋىنا قولداۋ كورسەتىپ، وسكەلەڭ دارىندى ۇرپاقتىڭ ەل ىشىنەن سۋىرىلىپ شىعۋىنا ىقپالىن تيگىزىپ كەلەدى.

- قازىرگى جاستاردىڭ اراسىنان كلاسسيكالىق مۋزىكادا اتى جۇرتشىلىققا تانىمال بولىپ ۇلگەرگەن، ءوزىنىڭ ونەرىن ءارى قاراي جەتىلدىرىپ جۇرگەن تالانتتار رەتىندە كىمدەردى اتار ەدىڭىز؟

- كلاسسيكالىق مۋزىكا سالاسىندا ەلىمىزدىڭ اتىن الەمگە تانىتىپ، ونىڭ مادەني كەلبەتىن قالىپتاستىرىپ، ۇلگى تۇتارلىق ونەر يەلەرىنە اينالىپ جاتقان جاڭا ەسىمدەردىڭ پايدا بولۋى كوڭىل قۋانتادى. مۋزىكا الەمىنە بويلاۋدى ادامنىڭ شامامەن 15-18 جاسىندا عانا باستايتىنىن ەسكەرە وتىرىپ، جاستار رەتىندە 20-35 جاس ارالىعىنداعى تالانت يەلەرىن اتاپ وتۋگە بولادى. ولاردىڭ قاتارىندا الان بورىبايەۆ، ەرمەك قۇرمانايەۆ، ماريا مۋدرياك، قانات وماروۆ، ءامىر بيسەنعاليەۆ، شىرىن بازارقۇلوۆا سىندى اسا تالانتتى جاستارىمىز بار... مۋزىكانتتاردىڭ كەيىنگى ۇرپاعى حالىقارالىق دەڭگەيدە ءبىلىم العان، ءارى ولار الەمنىڭ ەڭ ۇزدىك كونتسەرت زالدارىندا ونەر كورسەتۋدە تاجىريبەگە دە يە. تالانتىنا جۇرت ءتانتى بولعان ونەرپازدارىمىزدى قولداۋدىڭ ماڭىزى زور. ماعان الماتىنىڭ وپەرا تەاترىنىڭ جاس تالانتتاردى تارتۋداعى بەلسەندىلىگى، «قازاقستان كامەراتاسىنىڭ» دارىندى وركەسترانتتار ءۇشىن ءاردايىم اشىقتىعى وتە ۇنايدى، جاستار وركەسترلەرىنىڭ كوپتەپ قۇرىلۋى ءتارىزدى بەتالىستار اعىمداعى جىلى ايرىقشا ايقىن كورىنىس بەرۋدە.

- بولاشاققا قانداي جوسپارلارىڭىز بار؟ راديونىڭ قۇرىلۋىنىڭ 5- جىلىنا اياق باسقان ۋاقىتتا ءوز تىڭدارماندارىڭىزدى قانداي جاعىمدى جاڭالىقتارمەن قۋانتپاقسىزدار؟

- مامىر ايىنىڭ سوڭىندا راديومىز اقتاۋ قالاسىندا ىسكە قوسىلدى. بۇل راديو ەفيرىندە كلاسسيكالىق مۋزىكا وينايتىن قازاقستاننىڭ ءۇشىنشى قالاسى بولدى. «قازاقستان» تەلەراديوكورپوراتسياسى حابار تاراتۋ گەوگرافياسى اياسىن ودان ءارى ۇلعايتپاق، بۇل قۋانىش تۋدىرار جايت جاقىن ارادا ورىن الادى دەپ ۇمىتتەنەمىن. سونداي-اق ءبىزدىڭ جوسپارىمىزدا جاڭا باعدارلامالار شىعارۋ مەن ۇلكەن كونسەرت ۇيىمداستىرۋ بار. سونىمەن قوسا تىكەلەي ەفيردە حابار تاراتۋ جانە تىڭدارماندارمەن ەفيردەن تىس كەزدەسۋلەر وتكىزۋ ۇلەسىن ارتتىرۋ دا ويىمىزدا ءجۇر.

- اڭگىمەڭىزگە ۇلكەن راحمەت!

- ءبىزدىڭ تىڭدارماندارىمىزعا زور الىعىسىمدى بىلدىرگىم كەلەدى جانە ولاردى دا وسى ايتۋلى كۇنمەن قۇتتىقتايمىن! ءوسىپ- وركەندەۋلەرىن جانە كەرەمەت اۋەندەردىڭ كوبەيە بەرۋىن تىلەيمىن!

 سۇحباتتاسقان: گۇلنار جومارتوۆا