جاپپاي قىرىلعان كيىكتەردىڭ قانداي اۋرۋمەن اۋىرعانى انىقتالدى

استانا. قازاقپارات - بۇگىن ۇكىمەت ۇيىندە ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ بەتپاقدالا كيىكتەر پوپۋلياتسياسىنىڭ جاپپاي قىرىلۋ جاعدايىنا قاتىستى ۇسىنىستاردى قاراستىرۋ ءۇشىن جۇمىس توبىنىڭ وتىرىسىن وتكىزدى، دەپ حابارلايدى ق ر پرەمەر-ءمينيسترىنىڭ باسپا ءسوز قىزمەتىنەن.

وتىرىسقا ءبىرقاتار مينيسترلىكتەردىڭ، اكىمدىكتەردىڭ، عىلىمي ۇيىمداردىڭ، ۇكىمەتتىك ەمەس ۇيىمداردىڭ وكىلدەرى مەن تاۋەلسىز ساراپشىلار قاتىستى.

اعىمداعى جىلدىڭ 2 -ماۋسىمىنداعى جاعداي بويىنشا بەتپاقدالا پوپۋلياتسياسىندا 132329 كيىك، سونىڭ ىشىندە قوستاناي وبلىسىندا -113309، اقمولا وبلىسىندا - 9386، اقتوبە وبلىسىندا - 9634 كيىك قىرىلدى. جانۋارلاردىڭ تاعى قىرىلۋ وقيعالارى ازىرگە تىركەلمەدى.

كيىكتەردىڭ ءولى دەنەلەرى تابىلعان جەرلەردە مامانداندىرىلعان زەرتحانالار مەن عىلىمي ۇيىمداردىڭ ماماندارى زەرتحانالىق جانە عىلىمي زەرتتەۋلەر ءۇشىن قىرىلعان جانۋارلاردىڭ پاتولوگيالىق ماتەريالدارىن، جەر توپىراعىن، سۋ، وسىمدىكتەر سىنامالارىن الدى. ۆەتەريناريا بويىنشا ۇلتتىق رەفەرەنتتى ورتالىقتىڭ اقپاراتىنشا، ولاردان پاستەرەللەز اۋرۋىنىڭ قوزدىرعىشى تابىلعان.

 شەتەلدىك ساراپشىلار كەلەسى اپتادا ءوز زەرتتەۋلەرىنىڭ الدىن-الا ناتيجەلەرىن ۇسىنۋدى جوسپارلاپ وتىر.

ءوز كەزەگىندە ينۆەستيتسيا جانە دامۋ مينيسترلىگىنىڭ اەروعارىش كوميتەتى بوكەندەردىڭ قىرىلۋى زىمىران- عارىشتىق قىزمەتكە بايلانىستى بولۋى مۇمكىن ەمەس ەكەندىگىنە دەرەكتەر كەلتىردى، ويتكەنى كيىكتەر قىرىلعان اۋماقتاردا زىمىران وتىنى قالدىقتارىمەن زىمىران تاسىعىشتىڭ بولىكتەرى قۇلاعان ەمەس.

وتىرىس ناتيجەسى بويىنشا باقىتجان ساعىنتايەۆ اۋىل شارۋاشىلىعى مينيسترلىگىنە اكىمدىكتەرمەن بىرلەسىپ، جاعدايعا مونيتورينگ جۇرگىزۋدى، قىرىلعان جانۋارلاردى جويۋ بويىنشا جۇمىستاردى جالعاستىرۋدى، عىلىمي ماقساتتا پايدالانعاندى قوسپاعاندا، قازاقستاننىڭ بارلىق اۋماعىندا كيىكتەردى اۋلاۋعا سالىنعان تىيىمدى ۇزارتۋ تۋرالى شەشىم دايىنداۋدى تاپسىردى.

ءبىلىم جانە عىلىم مينيسترلىگىنە كيىكتەر پوپۋلياتسياسىنا جەرسەرىكتىك مونيتورينگ جۇرگىزۋ، ەكسپەديتسيالىق توپقا بەتپاقدالادا اتالعان جانۋارلاردىڭ قىستايتىن، تولدەيتىن ورىندارىنداعى، جازعى جايلاۋىنداعى سۋدى، اۋانى، توپىراقتى، وسىمدىكتەردى زەرتتەۋدى ۇيىمداستىرۋدى تاپسىردى. بۇدان باسقا، بيولوگيالىق قاۋىپسىزدىك پروبلەمالارى عىلىمي زەرتتەۋ ينستيتۋتى  بازاسىندا كيىكتەردىڭ اۋرۋلارىن زەردەلەۋ، ونىڭ الدىن الۋ جانە ەمدەۋ ادىستەرىن ازىرلەۋ جونىندەگى ورتالىق (ءتالىمباق) قۇرۋ ماسەلەسىن قاراۋدى تاپسىردى.

جۇمىس توبى اپتا ىشىندە ۇكىمەتتىڭ ودان ءارى قاراۋى ءۇشىن ءوز ۇسىنىستارىن پىسىقتايدى.