ن. نازاربايەۆ پەن س. ەلبەگدورج كوپتەگەن حالىقارالىق ماسەلەلەر بويىنشا قازاقستان مەن موڭعوليا ۇستانىمىنىڭ ورتاقتىعىن اتاپ ءوتتى
17:27, 03 - ماۋسىم 2015
استانا. قازاقپارات - مەملەكەت باسشىسى نۇرسۇلتان نازاربايەۆ موڭعوليا پرەزيدەنتى ساحياگيين ەلبەگدورجبەن تەلەفون ارقىلى سويلەستى، دەپ حابارلايدى اقوردانىڭ باسپا ءسوز قىزمەتىنەن.
اڭگىمە بارىسىندا ساياسي، ساۋدا-ەكونوميكالىق جانە گۋمانيتارلىق سالالارداعى ەكىجاقتى ىنتىماقتاستىقتىڭ وزەكتى ماسەلەلەرى ەگجەي-تەگجەيلى تالقىلاندى.
ەكى ەل كوشباسشىلارى قازاقستان مەن موڭعوليانىڭ كوپتەگەن حالىقارالىق ماسەلەلەر جونىندەگى ۇستانىمىنىڭ ورتاقتىعىن جانە كوپجاقتى ۇيىمدار مەن فورۋمدار اياسىنداعى ىقپالداستىق دەڭگەيىنىڭ جوعارىلىعىن اتاپ ءوتتى.
تاراپتار كوپعاسىرلىق دوستىق پەن مادەني ورتاقتىققا نەگىزدەلگەن قازاق- موڭعول قارىم-قاتىناستارى الداعى ۋاقىتتا دا قازاقستان مەن موڭعوليا حالىقتارىنىڭ يگىلىگى ءۇشىن قارقىندى دامي بەرەتىنىنە سەنىم ءبىلدىردى.
تەلەفون ارقىلى سويلەسۋگە موڭعوليا جاعى باستاماشىلىق ەتتى.