استانادا مەملەكەتتىك رامىزدەر كۇنىنە وراي شارالار وتەدى
4-10 -ماۋسىم ارالىعىندا «الجير» مەموريالدى- مۇراجاي كەشەنىندە «ەلىمنىڭ رامىزدەرى - تاۋەلسىزدىكتىڭ بەلگىسى» اتتى سلايد كورمەسى ۇيىمداستىرىلادى.
سونىمەن قاتار 4 -ماۋسىمدا ساعات 11.00 دە «اتامەكەن» قازاقستان كارتاسى» ەتنومەموريالدىق كەشەنىندە «رامىزدەردى قۇرمەتتەيىك» اتتى دوڭگەلەك ۇستەل وتەدى. شاراعا ەلوردانىڭ بەلسەندى جاستارى تارتىلادى. كونفەرەنسيانىڭ باستى ماقساتى - مەملەكەتتىك رامىزدەرگە دەگەن قۇرمەتتى ناسيحاتتاۋ، جاس ۇرپاقتى پاتريوتيزمگە باۋلۋ.
ال قالانىڭ بارلىق كىتاپحانالارىندا ءبىر اي بويى رامىزدەر تاريحىنان سىر شەرتەتىن كىتاپ كورمەلەرى ۇيىمداستىرىلادى. 4 -ماۋسىمدا №8 -قالالىق كىتاپحانادا «قازاقستاننىڭ مەملەكەتتىك رامىزدەرى» اتتى ەلوردا تۇرعىندارىمەن اڭگىمەلەسۋ ساعاتى، №2 -كىتاپحانادا - «ەل رامىزدەرى - ەل رۋحى» اتتى ازاماتتىق ساباق وتەدى.
ەسكە سالا كەتەيىك، 1992 -جىلعى 4 -ماۋسىمدا ەلباسى ن. ءا. نازاربايەۆ «قازاقستان رەسپۋبليكاسىنىڭ مەملەكەتتىك رامىزدەرى تۋرالى» زاڭعا قول قويدى.