قازاقستاندىق تەلەجۋرناليستەر حالىقارالىق بايقاۋدان ءبىرىنشى جۇلدەمەن ورالدى - فوتو
«قازاقستان» ر ت ر ك» ا ق باتىس قازاقستان فيليالىنىڭ ديرەكتورى اسلانبەك عۇباشيەۆتىڭ ايتۋىنشا، نەگىزىنەن ۇلى جەڭىس تاقىرىبىنا ارنالعان ءداستۇرلى بايقاۋعا وسى جولى جەتى مەملەكەتتىڭ وكىلدەرى قاتىسىپ، ولاردىڭ 370 جۇمىسى ساراپقا سالىندى.
بۇل - قازاقستان اتىنان بارعان باتىس قازاقستاندىقتاردىڭ مۇنداي حالىقارالىق فەستيۆالعا ءبىرىنشى قاتىسۋى. بۇل جانە وزگە تىلدە (قازاق تىلىندە) تۇسىرىلگەن شىعارمانىڭ فەستيۆالدا العاش باق سىناۋى ەكەن.
سوعان قاراماستان، «سوعىس جاڭعىرىعى» تەلەتۋىندىسى تاجىريبەلى قازىلار القاسىنىڭ كوڭىلىنەن شىقتى. «سوعىس جاڭعىرىعى» (اۆتورى - جيدەگۇل امانعالي، رەجيسسەرى جىگەر قۇماروۆ، وپەراتورى تاراس قاجىموۆ، دىبىس رەجيسسەرى تۇرار رازعاليەۆ) ستالينگراد مايدانىنا ءتيىپ تۇرعاندىقتان، سوعىس جاعدايىندا دەپ جاريالانعان جانىبەك، وردا (قازىرگى بوكەي ورداسى) اۋداندارىنداعى وقيعالاردى قامتيدى.
بۇل اۋدانداردا سوعىس ىزدەرى (باۋىرلاستار زيراتتارى، سنارياد تيگەن عيماراتتار، بومبادان قالعان شۇڭقىرلار، ورلار) ءالى كۇنگە دەيىن ساقتالعان، سونىڭ ىشىندە جانىبەك اۋدانىنداعى قاندىقۇدىق ەلدى مەكەنى تۇسىندا قۇلاعان ۇشاق قالدىقتارى دا بار. سوعىس جالىنى جانىبەك پەن وردانى شارپىعانىن كوپشىلىك ءالى بىلە بەرمەيدى. مىنە، اتالمىش تۋىندى وسىنى پاش ەتەدى.
ايتا كەتەيىك، باس جۇلدەنى «ستالينگراد ەنتسيكلوپەدياسى» اتتى باعدارلامالار توپتاماسى ءۇشىن «ۆولگوگراد-ت ر ۆ» م ت ر ك يەلەندى، بۇل تەلەارنانى قانداسىمىز اسلانبەك كەراشيەۆ باسقارادى.