قىزىلوردالىق بالالار «بىلىمدىلەر تەڭىزىنە» ساياحاتتادى - فوتو
شارا بارىسىندا بالالار « كەمەمەن» «تەڭىز ارالدارىنا» ساياحات جاسادى. مەرەكە بارىسىندا وبلىس اكىمى قىرىمبەك كوشەربايەۆ « كەمە كاپيتانى» ازات قارەكەيەۆپەن « ءبىلىم تەڭىزىندە» ورنالاسقان وقۋشىلارعا جان- جاقتى قابىلەتتەرىن دامىتاتىن 15 «ارالعا» ساياحات جاساپ، بالالاردىڭ شىعارماشىلىعىمەن تانىستى.
ولار «سۋرەتشىلەر اللەياسى»، « كوشباسشىلار»، «Happy English»، « ساياحاتشىلار»، « دەفيلە»، « دومبىرا دۋمان»، « سيقىرلى شارشى»، « جاسىل پاترۋل»، « ءبىلىم»، « جىلدامدىق»، « قولونەر»، «مەنىڭ قيالىمداعى قالا»، « فوتوگالەرەيا»، « روبوت تەحنيكا ارالدارىنا» ساياحات جاساپ، ءبىلىم دەڭگەيلەرى سىنالاتىن سايىستارعا قاتىستى.
- « بارىم - بالام ءۇشىن» دەگەن ۇستانىممەن، كوزىمىزدىڭ قاراشىعىنداي بۇلدىرشىندەردىڭ بولاشاعىن باياندى ەتۋ، پەرزەنتتەرىمىزدىڭ ەرتەڭى ءۇشىن ەڭبەك ەتۋ - بۇل بارشا ادامزاتقا ورتاق پاراساتتى پارىز دەپ بىلەمىن. بولاشاعىمىز سانالاتىن بالالارىمىز سپورتتا دا، ونەردە دە، ومىردە دە جاقسى جەتىستىكتەرىمەن قۋانتىپ، ايماعىمىزدىڭ اتىن شىعارا بەرسىن، - دەدى وبلىس اكىمى ق. كوشەربايەۆ.
ايماقتا كەلەشەك ۇرپاقتىڭ سانالى ازامات بولىپ جەتىلۋى ءۇشىن تولىمدى تىرلىكتەر جاسالىپ جاتىر. اتاپ ايتساق، سوڭعى ءۇش جىلدا ءبىلىم بەرۋ سالاسىنا بولىنگەن قارجى 3,3 ەسەگە ءوستى. وبلىستا بالالاردىڭ 92 پايىزى مەكتەپكە دەيىنگى تاربيە بەرۋمەن قامتىلعان. وسى جىلدىڭ سوڭىنا دەيىن بۇلدىرشىندەر بالاباقشامەن تولىق قامتاماسىز ەتىلىپ، بۇل كورسەتكىش 100 پايىزعا جەتەدى. جاڭادان بوي كوتەرىپ جاتقان ءبىلىم وشاقتارىنىڭ دا سانى ارتىپ كەلەدى. اپاتتى جاعدايداعى مەكتەپ ماسەلەسى 2 جىلدىڭ كولەمىندە شەشىلەدى. مۇنىڭ بارلىعى بالالاردىڭ زامان تالابىنا ساي تاربيەمەن قامتىلىپ، ءبىلىم الۋى ءۇشىن جاسالىپ جاتقان جاعداي.
شارا بارىسىندا بالالار ساياحاتتاعان ءار «ارالدىڭ» وزىندىك ەرەكشەلىكتەرىمەن ەستە قالدى. بىرىندە بالالار مانەرلەپ ولەڭ وقىسا، ەندى بىرىندە ەرتەگىلەر ساحنالاندى. سپورتتىق سايىستار، اس ءمازىرىن ازىرلەۋ، سۋرەت سالۋ، قولونەر سايىستارى بالالاردىڭ قىزىعۋشىلىعىن ارتتىردى.
وقۋشىلار سارايىنا مەكتەپ جاسىنداعى بالالاردىڭ مەكتەپتەن تىس ۋاقىتىن ءتيىمدى وتكىزۋ جانە وقۋشىلاردىڭ ينتەللەكتۋالدىق دامۋىنا جاعداي جاساۋ ماقساتىندا كارتادروم الاڭى قۇرىلىسىنا، سپورتتىق كارتينگ ماشينالارىن، ءبىلىم ورتالىعىنا پلانەتاريي كۇمبەزىن، 20 روبوت تەحنيكاسىن الۋعا جانە مۋلتيمەديا كابينەتىن جابدىقتاۋعا جەرگىلىكتى بيۋدجەتتەن قارجى ءبولىندى. اتالعان الاڭداردى ايماق باسشىسى ارالاپ كورىپ، كارتينگ ماشينالارىنىڭ جىلدامدىعىن تاماشالادى.
شارا بارىسىندا بەلسەندىلىك تانىتقان وقۋشىلار ءتۇرلى نوميناتسيالار بويىنشا ماراپاتتالىپ، وبلىس باسشىسىمەن ەستەلىك سۋرەتكە ءتۇستى.