بالتىق بويى ەلدەرى ورتاق اۋە قورعانىسىن قۇرماق
ءۇش ەل مينيسترلەرى 28 - مامىردا ليتۆانىڭ پانيەۆەزيس قالاسىندا ۋكراينا قورعانىس مينيسترىمەن كەزدەسكەن.
ليتۆا قورعانىس ءمينيسترى يۋوزاس ولەكاستىڭ مالىمدەۋىنشە، ءۇش ەل «ورتا راديۋستا ارەكەت ەتەتىن اۋە قورعانىسى جۇيەسىن قۇرۋ مۇمكىندىكتەرىن تالداپ جاتىر». ول وزدەرىنىڭ ىنتىماقتاستىقتى ارتتىرۋىنا «سىرتقى قاۋىپ- قاتەرلەر» يتەرمەلەپ وتىرعانىن ايتادى.
لاتۆيا، ليتۆا جانە ەستونيا 2004 - جىلى ناتو قۇرامىنا كىرگەن. سودان بەرى بۇل ەلدەردىڭ اۋە كەڭىستىگىن ناتو كۇزەتەدى. وسى ايدىڭ باسىندا ءۇش ەل باسشىلارى ناتو- دان ءوز ەلدەرىندە اليانستىڭ تۇراقتى بىرنەشە مىڭ اسكەرىن ورنالاستىرۋدى سۇرايتىنىن مالىمدەگەن.
Associated Press اگەنتتىگىنە بەرگەن سۇحباتىندا ليتۆا سىرتقى ىستەر ءمينيسترى ليناس لينكيەۆيچۋس ۆيلنيۋس ناتو اسكەرىن رەسەيدى ارانداتۋ ءۇشىن ەمەس، «قاۋىپسىزدىك كەپىلى» رەتىندە ورنالاستىرۋعا تىرىساتىنىن ايتقان.
«ازاتتىق»