قازاقستاندا « اسىل بالا» قاۋىمداستىعى قۇرىلدى
بۇل تۋرالى بۇگىن « ق ر كونستيتۋتسياسى 20 جىل بالالاردىڭ قۇقىعى مەن دەنساۋلىعىن قورعاۋدا» اتتى رەسپۋبليكالىق كونفەرەنتسيا بارىسىندا قازاقپاراتقا بەرگەن سۇحباتىندا « اسىل بالا» رەسپۋبليكالىق قاۋىمداستىعىنىڭ ءتورايىمى انار راحىمبايەۆا ءمالىم ەتتى.
« بۇگىن ءبىز « اسىل بالا» رەسپۋبليكالىق قاۋىمداستىعىنىڭ قۇرىلتايشىلىق جيىنىن وتكىزۋدەمىز. بۇل بالالاردىڭ مۇددەلەرىن قورعاۋ ماسەلەلەرىمەن اينالىساتان قوعامدىق بىرلەستىكتەر مەن ۇكىمەتتىك ەمەس ۇيىمدارىنىڭ قاۋىمداستىعى بولىپ تابىلادى. تاۋەلسىزدىك جىلدارىندا ەلىمىزدە بالالار قۇقىعىن قورعاۋ باعىتىندا وتە كوپ جۇمىستار اتقارىلدى، الايدا الەم مەن قوعام وزگەرۋدە. سوندىقتان دا جەتكىنشەكتەردىڭ مۇددەسىن قورعاۋ ءاردايىم وزەكتى بولىپ قالا بەرەدى. ءبىز بالالار مۇددەسىن قورعاۋ سالاسىندا تيىمدىرەك جۇمىس ىستەۋ ءۇشىن، سونداي- اق مەملەكەتتىك باعدارلامالارعا ءوز ۇلەسىمىزدى ءتيىستى دەڭگەيدە قوسۋ باعىتىندا بىرىكتىك. بارلىق بالالار تۋعان بەتتە تەڭ قۇقىققا يە جانە بۇعان ءبىزدىڭ اتا زاڭىمىز كەپىل بەرىپ وتىر»، - دەپ توقتالدى ا. راحىمبەكوۆا.
قاۋىمداستىق ءتورايىمى بۇگىندە كەيبىر بالالار قوسىمشا كومەككە، مەملەكەت جانە قوعام تاراپىنان جەكەلەي قولداۋعا مۇقتاج ەكەنىن اتاپ ءوتتى. بۇل تۇرعىدا اتا- اناسىنىڭ قامقورلىعىنسىز قالعاندار، مۇگەدەك جانە باسقا دا ساناتتاعى بالالار بار.
«ءبىز وسى ورايدا بۇل بالالار بارشاسىمەن تەڭ دارەجەدە قاجەتتى جاعدايدا ومىردە لايىقتى ورىندارىن الۋىنا جاردەمدەسۋ ءۇشىن كۇش- جىگەرىمىزدى بىرىكتىرگىمىز كەلەدى»، - دەدى ول.
ايتا كەتەيىك، بۇگىنگى كونفەرەنسياعا قازاقستاننىڭ بارلىق وڭىرىنەن ۇ ە ۇ جانە قوعامدىق بىرلەستىكتەردىڭ وكىلدەرى، ۇكىمەت مۇشەلەرى جانە پارلامەنت دەپۋتاتتارى قاتىسۋدا.