قازاقستان رەسپۋبليكاسى قارۋلى كۇشتەرىندە تانك بياتلونى بويىنشا الەم چەمپيوناتىنىڭ قاتىسۋشىلارى انىقتالدى
وسى جارىستاردىڭ باستى ماقساتى - قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ ۇزدىك تانكتى ەكيپاجدارىن انىقتاۋ جانە اعىمداعى جىلعى تامىزدا رەسەي فەدەراتسياسىنىڭ «الابينو» پوليگونىندا وتەتىن تانك بياتلونىنان الەم چەمپيوناتىنا قاتىسۋ ءۇشىن ىرىكتەۋ جۇرگىزۋ.
ق ر قورعانىس مينيسترلىگى باسپا ءسوز قىزمەتىنىڭ مالىمەتىنشە، جارىسقا 4 كوماندادان قۇرالعان قۇرلىق اسكەرلەرىنىڭ 12 ۇزدىك تانكتى ەكيپاجى قاتىستى. ولار: «وڭتۇستىك»، «باتىس»، «شىعىس» وڭىرلىك قولباسشىلىقتارى جانە قازاقستان رەسپۋبليكاسى قارۋلى كۇشتەرىنىڭ اەروۇتقىر اسكەرلەرى.
سايىس ەكى كۇن ءوتتى، وندا ەكيپاجدار ەكى كەزەڭدە جەكە جارىسۋ مەن ەستافەتادا سايىسقا ءتۇستى. ەكى كەزەڭنىڭ قورىتىندىسى بويىنشا تورەشىلەر القاسى سايىس ناتيجەلەرىن ەسەپتەپ بولعانشا، تانكىشىلەر وزدەرىنىڭ اسكەري شەبەرلىكتەرىن پاش ەتتى. تانكتەر ءبىرىنىڭ ارتىنان ءبىرى ساپ تۇزەپ، ارنايى الاڭقايعا جول تارتتى. ۇلكەن 40 توننالى جاۋىنگەرلىك ماشينالاردىڭ مانيەۆرلارى ەشكىمدى بەي-جاي قالدىرمادى.
سايىس ناتيجەلەرى بويىنشا 1-ورىندى لەيتەنانت اسىلبەك ءمۇسىرمانقۇلوۆتىڭ تانك ەكيپاجى («شىعىس» ءو ڭ ق 10810 ءا/ب) ، 2-ورىندى لەيتەنانت ەلامان ابىشيەۆتىڭ تانك ەكيپاجى («شىعىس» ءو ڭ ق 10810 ءا/ب) جانە 3-ورىندى كاپيتان قانات ءنابيدىڭ تانك ەكيپاجى («وڭتۇستىك» ءوڭق 21450 ءا/ب) يەلەندى. جارىس جەڭىمپازدارى مەن جۇلدەگەرلەر مەدالدارمەن، ديپلومدار جانە باعالى سىيلىقتارمەن ماراپاتتالدى. ۇزدىك تانك ەكيپاجىنا ت-72 تانكىسىنىڭ التىن سۇلباسى تابىستالدى.
ودان باسقا، سايىس قورىتىندىسى بويىنشا 6 ۇزدىك تانكتى ەكيپاج ىرىكتەلدى، ونىڭ 4 ءۋى دايىندىق ناتيجەلەرى بويىنشا رەسەي فەدەراتسياسىنا تانكتى بياتلون بويىنشا الەم چەمپيوناتىنا اتتانادى.
بىلتىرعى جىلعى چەمپيوناتپەن سالىستىرعاندا تانك ەكيپاجدارىنىڭ كاسىبي دايىندىعىنىڭ جالپى دەڭگەيى وسكەنىن اتاپ وتكەن ءجون.