موڭعولياداعى ۇشقىشسىز ۇشاقتاردى قازاق بالاسى جاساپ ءجۇر - فوتو

استانا. قازاقپارات - موڭعوليا مەملەكەتتىك عىلىم جانە تەحنيكالىق ۋنيۆەرسيتەتىنىڭ ۇشقىشسىز ۇشۋ اپپاراتتارى زەرتحاناسىندا جۇمىس جاسايتىن ماناس سانياز ۇلى ۇشقىشسىز باسقارىلاتىن جۇك تاسىمالدايتىن ۇشاق جاساپ ءجۇر.

ماناس سانياز ۇلى 1985-جىلى بايان-ولگەي ايماعىندا دۇنيەگە كەلگەن. موڭعوليا مەملەكەتتىك عىلىم جانە تەحنيكالىق ۋنيۆەرسيتەتىن اۆياتسيا ينجەنەرى ماماندىعى بويىنشا باكالاۆر مەن ماگيستراتۋراسىن ءتامامداعان قازاق ازاماتى وسى وقۋ ورنىنداعى ۇشقىشسىز ۇشۋ اپپاراتتارى زەرتحاناسىندا 2010-جىلدان بەرى جۇمىس جاساپ كەلەدى.

بۇل كۇندە كييەۆتەگى ۇلتتىق اۆياتسيا ۋنيۆەرسيتەتىندە اسپيرانتۋرادا ءبىلىم الاتىن ول ۇلانباتىرداعى جۇمىسىنان قول ءۇزىپ كەتكەن جوق. قايتا، گەرمانيا، فرانسيا، يسپانيا، رەسەي، ۋكراينا، قىتاي، جاپونيا سىندى ەلدەردىڭ سىنىنان ءوتىپ، تاجىريبەسىن مەڭگەرگەن جاس جىگىتتىڭ قولىنان شىققان ۇشقىشسىز ۇشاقتار جۇك تاسىمالداۋعا جاراي باستادى.

«ءبىز زەرتحانامىزدا جاپونيانىڭ عالىمدارىمەن تىزە قوسا وتىرىپ كۆادروكوپتەر، تاپوگرافيالىق ۇشاق جانە جۇك تاسىمالدايتىن ۇشاق سياقتى ۇشقىشسىز ۇشۋ اپپاراتتارىن جوبالايمىز، قۇراستىرامىز جانە ولاردى قۇرىلعىلارمەن باسقارامىز. قازىر سىناق رەتىندە 5 كەلى جۇكتى 15 كيلومەتر قاشىقتىققا جەتكىزەتىن ۇشقىشسىز ۇشاقتاردى ءساتتى پايدالانۋدامىز. قىركۇيەك ايىنا دەيىن 70 كەلى جۇكتى 100-200 شاقىرىمعا تاسىمالدايتىن وسىنداي ۇشۋ اپپاراتىن قولدانىسقا شىعارامىز دەپ جوسپارلاپ وتىرمىز.

ۇشقىشسىز ۇشاقتاردى پايدالانىپ كوپتەگەن جۇمىستاردى ىستەۋگە بولادى. ءتىپتى، ادامنىڭ قولىنان كەلمەيتىن كەي شارۋانى وسىلار تىندىراتىن مۇمكىندىككە يە. سونداي-اق، الداعى ۋاقىتتا كۋبسات جاساۋدى دا قولعا الساق دەگەن ويدامىز»، - دەيدى ماناس.

اۆياتسيا ينجەنەرىنىڭ وسى سالا بويىنشا جۇمىس باستاۋىنا قاشىقتىقتان باسقارىلاتىن ويىنشىق ۇشاقتار تۇرتكى بولعان ەكەن. «ءالى ەسىمدە، 2-كۋرس وقىپ جۇرگەن كەزىم بولاتىن. جاتاقحانانىڭ تەرەزەسىنەن ماڭايداعى بالالاردىڭ پۋلتپەن باسقارىلاتىن ۇشاقتاردى ويناپ جۇرگەنىن كوزىم شالدى. سولاردى باقىلاپ وتىرىپ وسىنداي ۇشۋ اپپاراتتارىن نەگە كۇندەلىكتى قاجەتتىلىككە قولدانباسقا دەگەن ويدا بولدىم. سودان بەرى ۇشقىشسىز ۇشاقتاردى زەرتتەۋمەن كەلەمىن»، - دەيدى ول.

ماناس سانياز ۇلى انا تىلىنەن وزگە اعىلشىن، ورىس جانە موڭعول تىلدەرىن جەتىك مەڭگەرگەن. ونىڭ ستۋدەنت كەزىندە جاساعان پەپسي قۇتىسىنا شاق كەلەتىن سپۋتنيگى وسىدان 3 جىل بۇرىن وتكەن CanSat حالىقارالىق بايقاۋىندا التىن جۇلدەنى ەنشىلەگەن ەكەن.

اتاجۇرتى قازاقستانعا دا تالاي مارتە تابانى تيگەن قانداسىمىزدىڭ ءوز سالاسى بويىنشا قازاق ءۇشىن جاڭالىق جاراتۋ ويىنىڭ جوقتىعى ءبىزدى تاڭ قالدىردى.

تەحنيكانىڭ تەتىگىن مەڭگەرگەن ازامات بۇل جونىندە قىسقا قايىردى: «قازاقستانعا بارىپ جۇمىسىمدى جالعاستىرۋ تۋرالى ويلاپ كورمەپپىن. بارلىعىمىزدىڭ كوزدەگەنىمىز يننوۆاتسيالىق جاڭالىق اشۋ عوي. ەگەر قازاققا كەرەك بولسام، ارينە، قىزمەت ەتۋدەن باس تارتپاس ەدىم».

مايگۇل سۇلتان

Baq.kz